تەندروستیی جیهانی: نەخۆشیی سیل هێشتا كوشندەترین نەخۆشیی درمە

پەیام 

ڕێكخراوی تەندروستیی جیهانی ڕایگەیاند: نەخۆشیی سیل هێشتا كوشندەترین نەخۆشیی درمە لە جیهاندا و لە ساڵی ڕابردوودا نزیكەی ملیۆنێك و 230 هەزار كەسی كوشتووە.

ڕێكخراوەكە لە ڕاپۆرتی ساڵانەی خۆیدا هۆشداری دا لە لاوازیی ئەو پێشكەوتنەی لە بەرەنگاربوونەوەی نەخۆشیی سیلدا بەدەستهاتووە و دەشڵێت: هەر چەندە مردن بەهۆی سیلەوە بە ڕێژەی 3% و تووشبوون بە ڕێژەی 2% بەراورد بە ساڵی 2023 كەمیكردووە، هاوكات 10 ملیۆن و 700 هەزار حاڵەت لە ساڵی 2024دا تۆمار كراون كە لەنێویاندا 5.8 ملیۆن پیاو و 3.7 ملیۆن ژن و 1.2 ملیۆن منداڵ هەن.

تەندروستیی جیهانی باس لەوەش دەكات "سیل كە لە ڕێگەی هەواوە بڵاو دەبێتەوە كاتێك نەخۆشەكان دەكۆكن، یان دەپژمن، نەخۆشییەكە دەكرێت ڕێگری لێ بكرێت و چارەسەر بكرێت".

بەپێی ئامارەكان هەشت وڵات دوو لەسەر سێی حاڵەتەكانی سیل لە جیهاندا پێك دەهێنن كە هیندستان لە پێشەوەیانە بە ڕێژەی 25%، پاشان ئێندۆنیزیا، فلیپین، چین، پاكستان، نەیجیریا، كۆنگۆ و بەنگلادیش.

هاوكات پێنج هۆكاری سەرەكی كە دەبنە هۆی بڵاوبوونەوەی پەتاكە بریتین لە خراپیی خۆراك، تووشبوون بە ڤایرۆسی كەمی بەرگری لەش، شەكرە، جگەرەكێشان و بەكارهێنانی كحول.

ڕاپۆرتی ساڵانەی ڕێكخراوی تەندروستیی جیهانی ئاماژەی بەوەش دا "لە ئێستادا 63 تاقیكردنەوەی دەستنیشانكردن و 29 دەرمانی نوێ لە پەرەپێداندان، جگە لە تاقیكردنەوەی 18 پێكوتەی تاقیكاری لەسەر مرۆڤ، بەڵام سەرەڕای تێپەڕبوونی زیاتر لە سەدەیەك بەسەر بەكارهێنانی پێكوتەیەك بۆ منداڵان، هێشتا پێكوتەی تایبەت بە سیل بۆ گەورەساڵان نییە".