بڵاوبوونەوەى ڤایرۆسی ئیبۆلا لە كۆنگۆ گەیشتووەتە ئاستێكی مەترسیدار

پەیام 

ڕێكخراوی تەندروستیی جیهانی ئاستی مەترسیی ڤایرۆسی ئیبۆلا لە كۆنگۆ بۆ "زۆر بەرز" بەرزكردەوە و هۆشداری لە بڵاوبوونەوەی خێرای پەتاكە دەدات.

تێدرۆس ئەدهانۆم، بەڕێوەبەری گشتی ڕێكخراوی تەندروستیی جیهانی ڕایگەیاند، بەهۆی خێرایی بڵاوبوونەوەی ڤایرۆسی ئیبۆلا لە كۆماری كۆنگۆی دیموكرات، ئاستی مەترسییەكەیان لە "بەرز"ەوە بۆ "زۆر بەرز" گۆڕیوە. 

ئاماژەی بەوەش كرد، كە مەترسیی بڵاوبوونەوەی ڤایرۆسەكە لەسەر ئاستی وڵاتانی دەوروبەر "بەرزە"، بەڵام لەسەر ئاستی جیهانی هێشتا لە ئاستێكی "نزم"دایە.

بەپێی وتەكانی ئەدهانۆم، تا ئێستا 82 حاڵەتی تووشبوون و 7 گیانلەدەستدانی پشتڕاستكراوە تۆمار كراون، بەڵام مەزندە دەكرێت قەبارەی كارەساتەكە زۆر لەوە گەورەتر بێت، چونكە نزیكەی 750 حاڵەتی گوماناوی و 177 گیانلەدەستدانی تەمومژاوی هەن. سەبارەت بە وڵاتی ئۆگەنداش، ڕایگەیاند، كە بارودۆخەكە جێگیرە و تەنها دوو تووشبوو و یەك گیانلەدەستدان هەبووە كە لە كۆنگۆوە گەڕاونەتەوە.