3 کاتژمێر پێش ئێستا
61 جار خوێنراوەتەوە
"مێشوولە لەڕێگەی بۆنی جەستە و هەناسەوە قوربانییەكانی هەڵدەبژێرێت"
پەیام
توێژینەوەیەكی نوێی زانستی وەڵامی ئەو پرسیارە دەداتەوە: كە ئایا مێشوولە هەر لە خۆوە و هەڕەمەكی مرۆڤ دەگەزێت، یان قوربانییەكانی بە وردی هەڵدەبژێرێت؟
بەپێی توێژینەوەیەكی هاوبەشی زانایانی سوید و ئەفریقیا و ئەسیوپیا، مێشوولە خاوەنی هەستەوەرێكی زۆر وردە كە لە دووری 10 مەترەوە بەدوای مرۆڤ دەكەوێت.
زانایان دەڵێن: یەكەم ئاماژە كە مێشوولە پێی ڕادەكێشرێت، گازی دووەم ئۆكسیدی كاربۆنە كە لە كاتی هەناسەداندا دەردەچێت، دواتر تێكەڵبوونی ئەم گازە لەگەڵ گەرمیی جەستە و بۆنی تایبەتی پێست وا دەكات هەندێك كەس زیاتر لە كەسانی دیكە ببنە ئامانج!
لەو بارەوە، ڕیكارد ئێگنێل، زانای سویدی ئاماژە بەوە دەكات "مێشوولە تەنها 27 ئاوێتەی بۆنخۆش لەنێو هەزاران پێكهاتەی بۆنی مرۆڤدا دەستنیشان دەكات و بۆ دۆزینەوەی نێچیرەكەی بەكاریان دەهێنێت".
تاقیكردنەوەكە لەسەر 42 ژن و جۆرە مێشوولەیەكی مەترسیدار ئەنجام دراوە كە ڤایرۆسی تای خوێنبەربوون و تای زەرد دەگوازێتەوە، لە بەرەنجامی توێژینەوەكەدا توێژەران ئاشكرایان كرد "ڕەنگی پێست، یان قژ و چاو پەیوەندییان بە ڕاكێشانی مێشوولەوە نییە، بەڵكو هەموو شتێك پەیوەستە بەو پێكهاتە كیمیاییانەی جەستەی هەر مرۆڤێك بە جیاوازی لە كاتی هەناسەدان و ئارەقكردنەوەدا دەریان دەدات".
لە تۆڕە کۆمەڵایەتیەکان شەیری بکە