ڕووسیا: پێشڕەوییە سەربازییەكانمان ئۆكرانیا بەرەو ئاشتی ئاڕاستە دەكات

پەیام 

سەرۆكایەتی ڕووسیا ڕایگەیاندووە پێشڕەوییە سەربازییەكانیان بژاردەكانی ئۆكرانیاى بەرتەسك كردووەتەوە و بەرەو ئاشتی هانی دەدات، ڕاشیگەیاندووە، كە پلانەكەی ئەمریكا بۆ ئاشتی ڕادەستی رووسیا نەكراوە.

دیمیتری پیسكۆڤ، وتەبێژی كۆشكی سەرۆكایەتیی ڕووسیا (كرملین) ڕایگەیاند: پێشڕەویی سوپای ڕووسیا لە ئۆكرانیا بژاردەكانی بەردەم ڤۆلۆدیمێر زێلێنسكی، سەرۆكی ئۆكرانیای بەرتەسك كردووەتەوە و ناچاری دەكات بەرەو ئاشتی هەنگاو بنێت.

سەبارەت بەو پلانەی ئاشتی، كە ئەمریكا بۆ كۆتاییهێنان بە جەنگی ئۆكرانیا پێشكەشی كردووە، پیسكۆڤ ڕایگەیاند: "ئەمریكا هەندێك تێڕوانین و پێشنیاری لەم بارەیەوە هەیە، بەڵام بە شێوەیەكی فەرمی ڕادەستی ڕووسیا نەكراوە".

كۆشكی سەرۆكایەتی ڕووسیا ڕایشیگەیاندووە: ئێمە ئاگاداری هەندێك دەستكاری و گۆڕانكارین لەسەر پلانەكە، بەڵام لە ئێستادا بە فەرمی لە بارەیەوە قسە ناكەین تا ئەو كاتەی بەدەستمان دەگات.

وتەبێژی كۆشكی كرملین بە پێویستیشی زانی كۆبوونەوەی لووتكە لەنێوان ڤلادیمێر پوتین، سەرۆكی ڕووسیا و دۆناڵد ترەمپ، سەرۆكی ئەمریكا بەڕێوە بچێت، بەڵام لەگەڵ ئەوەشدا رایگەیاند: پێش كۆبوونەوەكە دەبێت ئامادەكاریی چڕ و پڕ لەسەر ئاستی شارەزایان ئەنجام بدرێت.