چوارچێوەی هەماهەنگی لەبارەی كاندیدی سەرۆكوەزیران كۆدەبێتەوە

پەیام

بڕیارە ئەمڕۆ جارێكی دیكە هێزەكانی چوارچێوەی هەماهەنگی شیعەكان بۆ پرسی پێكهێنانی كابینەی حكومەت و دیاریكردنی كاندیدی سەرۆكوەزیران، كۆببنەوە.

لەو بارەیەوە، سەڵاح بووشی، سەركردە لە دەوڵەتی یاسا، رایگەیاند، چوارچێوەی هەماهەنگی ئەمڕۆ لەبارەی پرسی پێكهێنانی حكوومەت، هەماهەنگی لەگەڵ هێزە هاوبەشەكانی دیكە و هەروەها تاوتوێكردنی دۆخی سیاسی وڵات كۆدەبێتەوە.

بووشی راشیگەیاند، چوارچێوەی هەماهەنگی لە قۆناغی گفتوگۆوە چوەتە قۆناغی یەكلایی كردنەوەی كاندیدی سەرۆكوەزیران و هەروەها كابینەی نوێی حكوومەت.

لە لایەكی دیكەوە، عەلی دیفاعی، سەركردە لە ئەنجومەنی باڵای ئیسلامی، رایگەیاندووە، لایەنە شیعییەكان لە قۆناغی ئێستا و داهاتوودا بە جدی و بە ڕونی لەبارەی دیاریكردنی كاندیدی سەرۆكوەزیران و هەروەها پشك و بەركەوتەی لایەنە سیاسییەكان لە كابینەی حكوومەتدا قسە دەكەن و دەیانەوێت ئەو پرسە یەكلایی بكەنەوە چونكە قۆناغی دیكەیان لە پێشە.