06/12/2025
210 جار خوێنراوەتەوە
ئەسیۆشەیتد پرێس: بەر لە كۆتایی ساڵ قۆناغی دووەمی ئاگربەست لە غـ.ەززە دەستپێدەكات
پەیام
وردەكاری قۆناغی دووەمی ئاگربەستی جەنگی سەر غەززە ئاشكرا دەبێت و چاوەڕوان دەكرێت بەر لە كۆتایی ئەمساڵ دەستپێبكات.
ئاژانسی ئەسیۆشەیتد پرێس لە زاری دیبلۆماتكارێكی ڕۆژاوایی و بەرپرسێكی عەرەبییەوە وردەكاری قۆناغی دووەمی ئاگربەستی جەنگی سەر غەززەی بڵاو كردووەتەوە و ڕایگەیاندووە: ئەو دەستەیەی بە ئەنجوومەنی ئاشتی ناو دەبرێت، لە نزیكەی 12 سەركردەی ڕۆژاوا و خۆرهەڵاتی ناوەڕاست پێكدێت و ئەركی بەڕێوەبردنی غەززەی پێسپێردراوە بۆ ماوەی دوو ساڵە و شایەنی درێژكردنەوەیە.
ئەو سەرچاوانە كە نەیانویستووە ناویان ئاشكرا بكرێت ئەوەیان بە ئاژانسەكە وتووە "لیژنەیەكی تەكنۆكراتی فەلەستینییش ڕادەگەیەنرێت و بەڕێوەبردنی ڕۆژانەی غەززەی پێ دەسپێردێت".
لەبارەی وادەی ڕاگەیاندنی دەستە و لیژنەكەیشەوە، ڕایانگەیاندووە: پێشبینی دەكرێت بكەوێتە میانی دیداری نێوان سەرۆكی ئەمریكا و سەرۆكوەزیرانی ئیسڕائیلەوە كە بڕیارە بەر لە كۆتایی ساڵ بەڕێوە بچێت.
لەبارەی هێزی نێودەوڵەتییشەوە كە لەسەر سنووری كەرتی غەززە و قەوارەی زایۆنییەوە جێگیر دەكرێت، ڕوونیان كردووەتەوە "هێشتا گفتوگۆكان لەبارەی بەشداری وڵاتانەوە بەردەوامن، بەڵام پێشبینی دەكرێت لە چارەكی یەكەمی ساڵی داهاتوو جێگیر بكرێت".
بەپێی قسەی ئەو سەرچاوانە دانوستانەكانی قۆناغی دووەمی ئاگربەست قورس دەبێت، بەتایبەت ئەوەی كە پەیوەندیی بە پرسی لەچەكداماڵینەوە هەیە.
لە تۆڕە کۆمەڵایەتیەکان شەیری بکە