پەرلەمانتارێكی (دەمپارتی) گومان دەخاتە سەر دوو ئەندامی شاندی ئیمڕاڵی

پەیام

پەرلەمانتارێكی (دەمپارتی) گومان دەخاتە سەر دوو ئەندامی شاندی ئیمڕاڵی و دەشڵێت: ئەوەی تائێستا شاندەكان بە ناوی ئۆجەلانەوە وتویانە لەژێر فشاردا بووە.

جەنگیز چاندار، پەرلەمانتاری پارتی یەكسانی و دیموكراتی توركیا (دەم پارتی) ڕایگەیاند: ئەو پوختەی كۆنووسەی لیژنەی هاوپشتی نیشتمانی‌و برایەتی‌و دیموكراسیی پەڕلەمان لەبارەی دیدارەكەی ئۆجەلان بڵاوی كردەوە هیچ بەهایەكی نییە و پێویستە بخرێتە سەبەتەی پەراوێزخراوەكانەوە.

جەنگیز چاندار، لە چاوپێكەوتنێكیدا لەگەڵ كەناڵی (ئیلكە تی ڤی)دا ڕایگەیاند: چەندین جار وتمان هەرچی لە لایەن شاندەكانەوە بە ناوی ئۆجەلانەوە دەوترێت لە ژێر فشاری حكومەتی توركیا و دەزگای "میت"دا بووە و دەستكاری دەكرێت و بە وردی گوزارشت لەوە ناكات ئۆجەلان چی دەوێت؟! ئەو ڕایشیگەیاند: كاتێك بڕیار بوو سری سورەیا ئۆندەر و پەروین بوڵدان بۆ ڕازیكردنی سەركردایەتیی هەسەدە بە داماڵینی چەك سەردانی ڕۆژاڤا بكەن گوایە ئەمە داواكاری ئۆجەلانە، لەو كاتەدا نوسیم متمانەم بە قسەی ئەو دوو كەسە نییە! بەتایبەتی كە دەوڵەت لەبری هاوسەرۆكانی دەمپارتی ئەو دوو كەسەی سەپاندبوو، زۆرێك لە هاوڕێیان ئەو كاتە هێرشیان كردە سەرم!
ئەم لێدوانەی پەڕلەمانتارەكەی هەدەپە لەكاتێكدایە باس لەوە دەكرێت سەرۆكایەتی پەڕلەمان تەواوی كۆنووسی كۆبوونەوەی لیژنە پەڕلەمانییەكەی لەگەڵ ڕێبەری زیندانییكراوی پەكەكەی بڵاو نەكردووەتەوە، بەڵكو دەقێكی كورتكراوەی بڵاو كردووەتەوە، ئەمەش ناڕەزایەتی لێ كەوتووەتەوە.