ڕۆژنامەکانی مەدرید کێشەکانی ڕیاڵ مەدرید ئاشکرا دەکەن

پەیام سپۆرت - بڕیار تەها

یانەی ڕیاڵ مەدریدی ئیسپانی بە دۆخێکی زۆر هەستیار و ئاڵۆزدا تێدەپەڕێت و لەدەستدانی کۆنترۆڵی ژووری جلگۆڕین گەرموگوڕترین باسی ڕۆژنامەکانە.

 پاش شکستەکەیان بەرانبەر سێڵتاڤیگۆ و کەڵەکەبوونی یارییە خراپەکان، کارگێڕی ڕیاڵ مەدرید بە سەرۆکایەتی فلۆرێنتینۆ پیرێز کۆبوونەوەی بەپەلەی ئەنجام داوە.

بەپێی زانیارییەکانی ڕۆژنامەی 'مارکا'، چابی ئەلۆنسۆ کۆنترۆڵی ژووری جلگۆڕینی لەدەست داوە،  ئێستا دۆخەکە زیاتر لەژێر ڕەحمەتی یاریزاناندایە نەک لەژێر دەسەڵاتی ڕاهێنەر.

سەرچاوەکە باس لەوەش دەکات، تیپەکە هیچ چارەسەر و داهێنانێکی هێرشبەری نییە، بەمەش قەیرانی هونەری بە ڕوونی دەرکەوت، کۆتا خولەکەکانی یارییەکەش بە جەختکردنەوە لە کێشەی یاریکردنی ڕیاڵ مەدرید و لەدەستدانی کەسایەتی لە یاریگای خۆیدا هات.

ڕۆژنامەی مەدریدییەکە پێیوایە، کێشەکانی ڕیاڵ مەدرید لە یاریی کلاسیکۆدا بە تەواوی دەرکەوت، کاتێک ڤینیسیۆس ساتی هاتنە دەرەوەی لە یاریگا ڕووبەڕووی ئالۆنسۆ وەستایەوە.

سەرچاوەکە ئاماژە بەوە دەکات، بیرۆکەی سەرەکیی چابی ئەوە بوو کە تیپێکی دەوێت هەمووان تێیدا ڕابکەن تائەوەی بەردەوام فشار بکەن بۆ وەرگرتنەوەی تۆپ، بێ گوێدانە ناو و پێگەی یاریزانەکان.

هەر بۆیە لە سەرەتاوە لەگەڵ ڤینیسیۆس و جود بێلینگهام توند بوو. مەبەستی  ئالۆنسۆ سزادانی ئەو دوو یاریزانە نەبوو، بەڵکو ڕاهێنانیان بوو لەسەر ئەنجامدانی شتێکی جیاواز لەوەی پێشتر دەیانکرد، هەروەها تێگەیاندنیان یاریزانەکان بەوەی بۆ یاریکردن لە تیپەکەی ئەودا، بە جۆرێکە دەبێت بەردەوام یاریزان لە جوڵەدا بێت.

ڕامۆن ئەلڤارێزی (ڕۆژنامەنووسیش) لە پەرەی خۆی بڵاویکردەوە و دەنووسێت: دوای شکستی سێڵتاڤیگۆ تووڕەییەکی گەورە لە یانەکە هەبوو بەهۆی ئاستی تیپەکەوە، بەڵام بە هیچ شێوەیەک پێش یاریی سیتی بڕیار نادرێت.

کۆتا زانیاریش کە ڕۆژنامەی 'ئێل مۆندۆ' ئاماژەی پێ کردووە، یارییەکەی بەرامبەر مانچێستەر سیتی کۆتا دەرفەتە بۆ ئەلۆنسۆ تائەوەی ئەنجامەکانی باش بکات، ئەگەرنا دوورخستنەوەی نزیکە.

هەروەها پەیوەندیی نێوان یاریزانەکان و ڕاهێنەر چاک قورسە چاک ببێتەوە و بەرپرسانی `ڕیاڵ مەدرید ئێستا بەدوای جێگرەوەدا دەگەڕێت.