هۆکاری ئەنجامنەدانی گرێبەست لە لایەن ڕیاڵ مەدریدەوە ئاشکرا دەبێت

پەیام سپۆڕت - مەڕوان تاڵیب

هۆکاری ئەنجامنەدانی گرێبەست لە لایەن یانەی ڕیاڵ مەدریدەوە لە مێرکاتۆی زستانەدا ئاشکرا دەبێت.

 حەوت ساڵی تەواو تێدەپەڕێت بەسەر دوایین جار کە یانە شاهانەکە لە نیوەی وەرزدا گرێبەستێکی ئەنجامدابێت، ئەویش کاتێک بوو کە براهیم دیازی لە مانچستەر سیتییەوە گواستەوە، بەمەش یانەکە دووبارە جەختی کردەوە کە بڕوای بە سوودی "میرکاتۆی زستانە" نییە.

ڕۆژنامەی "ماڕکا"ـی ئیسپانی، پەردەی لەسەر هۆکارەکانی ئەنجامنەدانی هیچ گرێبەستێکی نوێ لەلایەن یانە شاهانەییەکەوە لادا، کارگێڕی ڕیاڵ سەرەڕای ئەو هەموو فشار و ئەنجامە ناجێگیرانە، بڕوایان وایە تیپەکە پێویستی بە یاریزانی نوێ نەبووە و بەرپرسانی یانەکەش بڕوایان وایە ئەو یاریزانانەی ئێستا لە بەردەستدان توانای ئەوەیان هەیە تا کۆتایی وەرز کێبڕکێ لەسەر نازناوی لالیگا و چامپیۆنسلیگ بکەن.

هەروەها ئیدارەی یانەکە پێیان وایە کێشەی سەرەکی یانەکە بە کڕینی یاریزان چارەسەر نابێت، بەڵکو دەبێت کار لەسەر باشترکردنی لایەنی پزیشکی و ئامادەکارییە جەستەییەکان بکرێت بۆ کەمکردنەوەی پێکانەکان، نەک گۆڕینی پلانی گواستنەوەکان و مەدرید بڕیاریداوە هەوڵەکانی بۆ چارەسەرکردنی ڕەگی کێشە جەستەییەکان تەرخان بکات، ئەویش لە ڕێگەی سەرلەنوێ ڕێکخستنەوەی ستافی پزیشکی و جەستەییەوە.

لە کۆتایدا ئاماژە بەوە کراوە، نادڵنیایی لە مانەوەی ئاربیلوا لە کۆتایی ئەم وەرزە یەکێکە لەو خاڵانەی دیکە کە ڕیاڵ گرێبەستی ئەنجام نەداوە، چونکە دەکرێت کۆتایی وەرز ڕاهێنەرێکی نوێ بێت و بەپێی پلانی ئەو یاریزان بگوازرێتەوە.

لە ماوەی ڕابردوودا دکتۆر "نیکۆ میهیچ" بۆ سەرکردایەتیکردنی خزمەتگوزارییە پزیشکییەکان گەڕایەوە، هەروەها ڕاهێنەری جەستەیی بەناوبانگ "ئانتۆنیۆ پینتۆس" ئەرکی سەرپەرشتیکردنی ئامادەکارییە جەستەییەکانی پێسپێردرایەوە.