پەیوەندیکردنی هێرشبەرێکی گەورە بە بەرشەلۆنەوە یەکلا کرایەوە

پەیام سپۆڕت - مەڕوان تاڵیب

دوسانی ئیلیچی ڕاهێنەری توانای جەستەیی هەڵبژاردەی سڕبیا ئاشکرای کرد، دوسان ڤلاهۆڤیچی هێرشبەری یۆڤانتۆس ڕوو لە بەرشەلۆنە دەکات.

 کۆتایی ئەم وەرزە بۆندی هێرشبەرەکەی بیانکۆنێری کۆتایی دێت، لەو بارەیەوە، ئیلیچی ڕاهێنەری توانای جەستەیی هەڵبژاردەی سڕبیا ئەوەی پشتڕاست کردەوە، ڤلاهۆڤیچ ڕوو لە بەرشەلۆنە دەکات لە کۆتایی ئەم وەرزە بە شێوەی بێبەرانبەر.

ئیلیچ ئەوەش ڕوون دەکاتەوە، پێش ئەوەی ڤلاهۆڤیچ بچێتە یۆڤانتۆس هەلی ئەوەی هەبوو لە ئیسپانیا یاری بۆ ئەتلەتیکۆ مەدرید بکات، بەڵام ئەو کاتە بڕیاریدا ئیتاڵیا هەڵبژێرێت.

ڕاهێنەر توانا جەستەییەکەی سڕبیا، پێی وایە ڤلاهۆڤیچ بۆ ئەوەی بگەڕێتەوە سەر ئاستە بەرزەکەی سەردەمی فیۆرێنتینا، پێویستی بە پڕۆژەیەکی نوێ و یانەیەکی دیکە هەیە تاوەکو دووبارە بدرەوشێتەوە.

لە کۆتایدا ئیلیچ پێشبینی دەکات لە سەرەتای مانگی سێ ڤلاهۆڤیچ لە پێکانەکەی چاک ببێتەوە و دووبارە بگەڕێتەوە یاریگا و دەست بە تۆمارکردنی گۆڵ بکاتەوە.

جێگەی ئاماژەیە ئیلیچ لە ساڵی 2021ـەوە لەگەڵ ڤلاهۆڤیچ کار دەکات (چ بە شێوەی تاکەکەسی یان لە هەڵبژاردەی سڕبیا)، بۆیە شارەزاییەکی تەواوی لەسەر دۆخی جەستەیی و بیرکردنەوەی ئەو یاریزانە هەیە. ئاماژەی بەوەش کرد کە ڤلاهۆڤیچ لە ڕووی جەستەیی و پابەندبوون بە ژەمە خۆراکییەکانەوە یاریزانێکی "نایاب و بێوێنەیە".