دەیڤد ئانچلۆتی هۆکاری سەرکەوتوو نەبوونی ئالۆنسۆ ئاشکرا دەکات

پەیام سپۆڕت - مەڕوان تاڵیب

دەیڤد ئانچلۆتی، یاریدەدەری ڕاهێنەری پێشووی ڕیاڵ مەدرید هۆکاری سەرکەوتوونەبوونی چابی ئالۆنسۆ ئاشکرا دەکات.

 کوڕەکەی ئانچلۆتی، لە لێدوانێکی نوێدا تیشکی خستە سەر چەند پرسێکی گرنگ و باسی لە فەلسەفەی سەرکەوتنی باوکی و هۆکاری شکستی هەندێک پڕۆژەی ڕاهێنەرایەتی کرد و پەیامێکی ڕوونی ئاراستەی یاریزانانی ئێستای ڕیال مەدرید کرد و وتی: پێویستە یاریزانەکان بە باشی لە ڕۆڵەکانیان تێبگەن، هەبوونی ڕۆڵێکی جیاواز (وەک یاریزانی یەدەگ) هەرگیز بەو مانایە نییە کە ئەو ڕۆڵە گرنگییەکی کەمتری هەیە.

لەبارەی دوورخستنەوەی چابی ئالۆنسۆ لە پۆستەکەی)، دەیڤد وتیشی: هاوسەنگی لە بەرگریدا بنەمای سەرەکی هەر پڕۆژەیەکی سەرکەوتووە و باوکم هەمیشە ئەمەی پێ دەوتم، کاتێک خۆم بوومە ڕاهێنەر تێگەیشتم کە قسەکانی سەد لە سەد ڕاستن و پێموایە ئالۆنسۆ نەیتوانی ئەو هاوسەنگییە بەرگرییە دروست بکات، ڕەنگە بەهۆی نەبوونی کات یان بارودۆخی گونجاو نەبووبێت، هەندێکجار وەک ڕاهێنەر بەختت دەبێت و هاوسەنگییەکە دەدۆزیتەوە، هەندێکجار نا، چابی لەوەدا سەرکەوتوو نەبوو.

لە کۆتایدا دەیڤد ئانچلۆتی زیاتر ڕوونی کردەوە و ئاماژەی بەوەکرد، بۆ نموونە خۆسێلۆ یاریزانێکی یەدەگ بوو، بەڵام ئەو دۆخەی قبوڵ کرد و بووە باشترین یاریزان کە تا ئێستا بینیویەتی کە ڕۆڵی یەدەگ بەو شێوەیە ببەخشێت، لەو وەرزەی نازناوی چامپیۆندلیگیان بردەوە، ئەو باشترین بوو لە جێبەجێکردنی ئەو ئەرکانەی پێی دەسپێردرا، براهیم دیازیش بە هەمان شێوە یاریزانێکی یەدەگ بوو، بەڵام هەر کە دەچووە ناو یاریگاوە هەموو توانای خۆی دەبەخشی، نە تووڕە دەبوو و نە هیچ گلەییەکی دەکرد.