ڕابیۆ ئامانجی میلان لەم وەرزە ئاشکرا دەکات

پەیام سپۆڕت - مەڕوان تاڵیب

ئادریان ڕابیۆی فەڕەنسی و یاریزانی ئەیسی میلان ئامانجی تیپەکەی لەم وەرزە ئاشکرا دەکات.

 لە چاوپێکەوتنێکی بۆ کەناڵی سکای سپۆڕت" سەرەتا ڕابیۆ لەسەر بردنەوەی نازناوی خولی ئیتاڵی وتی: کارێکی قورسە بۆ یانەیەکی وەک ئێمە، چونکە تەنیا چەند یاریزانێکی کەم پێشتر نازناوەکەیان بردووەتەوە و ڕاهاتوون لەسەر ئەوەی هەوڵ بۆ بردنەوەی خولێک بدەن کە کاتێکی زۆر دەخایەنێت و پڕە لە فشار، بۆیە پێموایە کۆتایهێنان لە نێوان چوار پلەی پێشەوە ئامانجی گشتیی یانەکەیە و ئێمە ئەوە دەزانین، بەڵام من بە شەخسی ئامانجم بۆ شتێکی گەورەترە، چونکە ئەگەر بتوانیت نمرەی 10 بەدەست بهێنیت، نابێت بە 6 یان 9 نمرە ڕازی بیت.

سەبارەت بە ئالێگری، ئاردیان دەشڵێت: بە بڕوای من ئەوەی میلانی لە ساڵی ڕابردووەوە بۆ ئەمساڵ گۆڕیوە یاریزانێک یان پێکهاتەکە نییە، بەڵکو ڕاهێنەر و ستافەکەیەتی، ئێمە هەموومان ئالێگری دەناسین و زۆر گرنگە بۆ تیپێک ڕاهێنەرێکی هەبێت کە هەم لە ڕووی تەکتیکی و هەم لە ڕووی مرۆییەوە ئەوەندە بەهێز بێت.

لە کۆتایدا ڕابیۆ باسی لە ڕەفائیل لیاو کرد و ڕایگەیاند، ئەو یاریزانێکی خاوەن کوالیتییەکی گەورەیە و هەمووان ئەوە دەزانن، بەڵام پێویستە بەردەوام بێت لە گەشەکردن و پاشان ئەوە دەمێنێتەوە سەر خۆی لە ڕووی دەروونییەوە تێبگات دەیەوێت تا کوێ بڕوات.