لاپۆرتا ئاشکرای دەکات کە پارەیان بە نیگرێرا داوە بەڵام بۆچی؟

پەیام سپۆرت - بڕیار تەها

خوان لاپۆرتای سەرۆکی یانەی بەرشەلۆنە نکۆڵی لەوە ناکات کە پارەیان بە نیگرێرا داوە بەڵام دەڵێت: پێدانی پارە بۆ ئەوە نەبووە لایەنگری یانەکەیان بکرێت.

 میدیاکانی کەتەلۆنیا ئاشکرایان کردووە، هەریەکە لە لویس ئێنریکێ و ئێرنێستۆ ڤاڵڤێردی، ڕاهێنەرانی پێشووی یانەی بەرشەلۆنە، لە دادگا ئامادە بوون و وتویانە: ئێمە ئاگاداری ڕاپۆرتە ناوبژیوانییەکانی نێگرێرا نەبووین.

دواتر لە لێدوانێکدا بۆ میدیاکان لاپۆرتاش وتی: لە ڕاستیدا، من نێگرێرا و هیچ کام لە کەسە نزیکەکانی ئەو ناناسم. هەرگیز هیچ پەیوەندییەکم لەگەڵیان نەبووە، ئێمە پارەمان تەنیا لەبەرامبەر وەرگرتنی ڕاپۆرتەکاندا داوە، بە هیچ شێوەیەک بۆ ئەوە نەبووە ناوبژیوانان لایەنگری بەرشەلۆنە بکەن، ئێمە پێویستیمان بە هیچ لایەنگری و یارمەتییەک نەبووە.

لاپۆرتا ئەوەی ئاشکرا کرد، ئەو پارەدانانە شتێک بوو لە پێش ئەوەوە هەبووە، پرسیاری لە بەڕێوەبەرایەتی وەرزشی کردووە و ئەوانیش پێیان وتوە، کە لە وەرگرتنی ڕاپۆرتەکان بەردەوام دەبن.

لە کۆتایدا لاپۆرتا دەڵێت: هیچ ڕاپۆرتێکی قۆناغی سەرەتامان لەبەردەست نەماوە، چونکە هەر پێنج ساڵ جارێک بەڵگەنامەکان لەناو دەبرێن. تێچووی ڕاپۆرتەکان مەرج نەبوو بەژێر چاودێریی و وردبینی دەستەی کارگێڕیدا تێپەڕێت، ئەمەش پەیوەندی بە بڕی پارەکەوە هەبووە، بڕەکەی ئەوەندە زۆر نەبووە کە پێویستی بە ڕەزامەندی باڵا هەبێت.