15/12/2025
683 جار خوێنراوەتەوە
زیدان ڕێککەوتنی زارەکی بۆ ئەرکێکی ڕاهێنەرایەتی کردووە
پەیام سپۆرت - بڕیار تەها
زەینەدین زیدان بە مەبەستی وەرگرتنی ئەرکی ڕاهێنەرایەتی
هەڵبژاردەی فەرەنسا ڕێککەوتنی زارەکی ئەنجام داوە.
زیدان وەک یاریزان توانی مۆندیالی 1998 لەگەڵ هەڵبژاردەی
فەرەنسا بەدەست بهێنێت و لە یاریی کۆتایی دوو گۆڵی بەرانبەر بەڕازیل تۆمار کرد،
ئەم پیاوە بە ڕەچەڵەک جەزائیرییە ماوەیەکی زۆرە خۆی بۆ ڕاهێنەرایەتی هەڵبژاردەی
تۆپی پێی فەرەنسا ئامادە کردووە.
بەپێی دوایین زانیارییەکانی ڕۆژنامەی سکای سپۆڕتسی
بەڕیتانیا، لە چەند ڕۆژی ڕابردوو یەکێتی تۆپی پێی فەرەنسی و زیدان کۆبوونەوەیەکی
گرنگیان کردووە و لەو کۆبوونەوەیەدا ڕێککەوتنی زارەکی و سەرەتایی لە نێوان
هەردوولا کراوە، هەروەها بڕیارە بەم نزیکانە وردەکاریی گرێبەستەکە یەکلایی بکرێتەوە.
ئەمەش لە کاتێکدایە، چاوەڕوان دەکرێت و وابڕیارە دیدیە
دیشامپی ڕاهێنەری ئێستای فەرەنسا لە دوای مۆندیالی 2026 واز لە ڕاهێنەرایەتی
هەڵبژاردەکە بهێنێت.
زیدان وەک ڕاهێنەری ڕیاڵ مەدرید توانی سێ نازناوی یەک لە
دوای یەکی چامپیۆنسلیگ بۆ ئەو یانە ئیسپانییە بباتەوە، ئەمەش وایکردووە لای
بەرپرسانی تۆپی پێی وڵاتەکەی وەک سەرکردایەکی نموونەی بۆ ژووری جلگۆڕین سەیر
بکرێت.
لە تۆڕە کۆمەڵایەتیەکان شەیری بکە