مۆرینیۆ دەیەوێت ڕێگری لە بەرشەلۆنە بکات

پەیام سپۆڕت - مەڕوان تاڵیب

جۆزێ مۆرینیۆی ڕاهێنەری بەنفیکا لە ترسی هەوڵەکانی بەرشەلۆنە داوای نوێکردنەوەی گرێبەستی بەرگریکارێکی کردووە.

 ڕۆژنامەی "مۆندۆ دیپۆرتیڤۆ" ئاشکرای کردووە، بەرپرسانی یانە کەتەلۆنییەکە بەردەوامن لە گەڕان بەدوای بەرگریکارێکی دڵی بەرگریدا بە تایبەت دوای پێکانەکەی کریستێنس و ناڕوونیی دۆخی ئاراوخۆ و پڕنەکردنەوەی شوێنی ئینیگۆ مارتینێز.

بەپێی زانیارییەکانی موندۆ بێت، نیکۆلاس ئۆتامێندی، گرێبەستەکەی لەگەڵ بەنفیکا لە کۆتایی وەرزدا تەواو دەبێت، یەکێکە لەو ناوانەی بەرشەلۆنە بیری لێدەکاتەوە، چونکە پێیانوایە بەرگریکارەکە دەتوانێت ڕاستەوخۆ و بێ دواکەوتن ئاستێکی جێگیر پێشکەش بکات.

لای خۆشیانەوە، سەرچاوە پۆرتوگالییەکان ئاماژەیان بەوە کردووە، مۆرینیۆ داوای کردووە بە خێرایی گرێبەستی ئۆتامێندی نوێ بکرێتەوە بۆ ئەوەی ڕێگری لە گواستنەوەی بۆ بەرشەلۆنە بکرێت لە زستاندا، جۆزێ جەختی لە گرنگی ئۆتامێندی کردووەتەوە بۆ تیپەکە و داوای درێژکردنەوەی گرێبەستەکەی کردووە تەنانەت پێش ئەوەی ئارەزووی بەرشەلۆنە بۆ یاریزانەکە ئاشکرا بێت، ئەم پەیامەی ئاڕاستەی ڕۆی کۆستای سەرۆکی بەنفیکا کردووە، سەرەڕای ئەوەی بەرگریکارەکە و خێزانەکەی هەست بە ئاسوودی دەکەن.

شایەنی باسە بەرشەلۆنە تاکو 15ـی مانگی یەک کاتی لەبەردەمدایە بۆ پێشکەشکردنی ڕاپۆرتێکی پزیشکی فەڕمی بە لیژنەی لالیگا کە دووپاتی بکاتەوە کریستێنس بۆ ماوەیەکی درێژ دوور دەکەوێتەوە، ئەمەش ڕێگەیان پێدەدات ڕێژەی سەدا 80ـی مووچەکەی بۆ تۆمارکردنی یاریزانێکی نوێ بەکاربهێنن.