ئارتێتا پلانی یانەکەی بۆ مێرکاتۆی زستانە ئاشکرا کرد

پەیام سپۆرت - بڕیار تەها
میکێڵ ئارتێتای ڕاهێنەری یانەی ئارسیناڵ پلانی یانەکەی بۆ مێرکاتۆی زستانە ئاشکرا دەکات و نایشارێتەوە کە هەوڵی گواستنەوەی یاریزان دەدەن.

 لە میانەی کۆنگرەی ڕۆژنامەوانی پێش یارییەکەیان بەرانبەر ئەستۆن ڤێلا، سەرەتا ئارتێتا ڕووبەڕووی پرسیاری مێرکاتۆی زستانە کراوە و لە وەڵامدا وتی:  لە مێرکاتۆی زستانەدا بە شێوەیەکی چالاکانە هەوڵ بۆ بەهێزکردنی پێکهاتەی تیپەکەمان دەدەین و ئەرکی ئێمە ئەوەیە کە زۆر بە باشی بۆ مێرکاتۆ ئامادە بین، چونکە لەوانەیە لە هەر ساتێکدا (گۆڕانکارییەک) ڕووبدات.

لە بەردەوامی قسەکانیدا ڕاهێنەرەکەی تۆپچییەکان وتیشی: مێرکاتۆ بەستراوەتەوە بەوەی چەندێک یاریزانی دیاریکراو بەردەست دەبن، بازاڕی گواستنەوەکان کراوەیە و مەبەستم ئەوەیە، ئێمە ئارسیناڵین و دەبێت هەمیشە چاومان لە بازاڕەکە بێت.

لە کۆتایدا سەبارەت بە دوایین شکستی تیپەکەی بەرانبەر ئەستۆن ڤێلا لە هەفتەی 15 و لە سەرەتایی ئەم مانگە، ئارتێتا وتی: دووبارە سەیری یارییەکە دەکەینەوە، هەندێک بیرۆکە هەیە پێویستە باشتر ئەنجامیان بدەین، شێوازی دۆڕانەکەمان کەمێک قورس بوو، بەڵام وانەی لێ وەردەگرین، یارییەکی زۆر قورسە، ئاستی ئەوان دەزانین و دەشزانین چی دەکەن، بەڵام لە هەمان کاتدا یارییەکی جوانە لە ڕووی ئامادەکاری و یاریکردنەوە، ئەستۆن ڤێلا شایەنی ئەوەن لە ناوچەی پێشەنگدا بن، سەیری ئەوە بکەن کە ئۆنای ئیمری چی بۆ ئەو یانەیە کردووە. ئەوان بە تەواوی شایەنی ئەو ستایشەن.