شەڕ لە گەڕەكە كوردنشینەكانی حەلەب كۆتایی پێ‌ هێنرا و هێزەكانی هەسەدە دەگوازرێنەوە

پەیام 

لەسەر پێشنیازەكەی وەزارەتی بەرگریی سووریا، شەڕ لە گەڕەكە كوردنشینەكانی حەلەب كۆتایی پێ‌ هێنرا و، هێزەكانی هەسەدە لەو گەڕەكانەوە بۆ ڕۆژئاوای كوردستان دەگوازرێنەوە.

دوای ئەوەی كە وەزارەتی بەرگریی سووریا بانگەوازێكی بۆ كۆتاییهێنان بە جەنگی گەڕەكە كوردنشینەكان بڵاو كردەوە، كەمێك لەمەوبەر تەلەفزیۆنی فەرمی سووریا بڵاوی كردووەتەوە كە چەند پاسێك بۆ گواستنەوەی چەكدارانی هەسەدە چوونەتە ناو گەڕەكەكانەوە و لە ماوەی چەند كاتژمێرێكدا بە چەكە سووكەكانیانەوە بۆ ڕۆژهەڵاتی فورات دەگوازرێنەوە.
پێشتر و لە كاتژمێرەكانی ڕابردوودا وەزارەتی بەرگریی سووریا مۆڵەتێكی شەش كاتژمێری بۆ ڕاگرتنی جەنگ، بە مەبەستی چۆڵكردنی گەڕەكەكانی ئەشرەفیە و شێخ مەقسود لەلایەن شەڕكەرانی  هێزەكانی سووریای دیموكراتەوە ڕاگەیاند، بەڵام ماوەكەی كۆتایی هات و بەدەمەچوون بۆ داواكەی حكومەتی وڵاتەكە نەبوو.
بەپێی ڕاگەیەنراوەكەی وەزارەتی بەرگریی سووریا مۆڵەتەكە لە كاتژمێر سێی بەرەبەیانی ئەمڕۆوە چووەتە بواری جێبەجێكردنەوە و كاتژمێر نۆی ئەم بەیانییە كۆتایی هات.

لە ڕاگەیەنراوەكەدا، وەزارەتی بەرگریی سووریا ڕوونی كردبووەوە كە ڕێگە بە چۆڵكردنی شەڕكەڕەكان بە چەكی بچوك و خۆیانەوە دەدات لە گەڕەكەكاندا، وەك ئامادەكارییەك بۆ گەڕانەوەی دەسەڵاتی حكومەت بۆ ئەو ناوچانە.

ئاماژەی بەوەیش كردبوو كە هێزەكانی ئاسایشی ناوخۆی سووریا هەماهەنگی لەگەڵ دەستەی ئۆپراسیۆنەكانی سوپای سووریا دەكەن بۆ میكانزمی دەرچوونی شەڕكەڕەكانی هەسەدە بە ئاڕاستەی باكووری ڕۆژهەڵاتی سووریا.

ئەمە و تا ئەم ساتە هەسەدە بە فەرمی هیچ ڕاگەیانراوێكی لەسەر ئەم ڕێككەوتنە نەبووە بەڵام بەپێی هەواڵی میدیای سووری ڕێككەوتن ئەنجام دراوە.