زانایانی ئایینی: بەئامانجگرتنی گەڕەكە كوردنشینەكانی حەلەب پێچەوانەی بنەماكانی ئیسلامە

پەیام

یەكێتی زانایانی ئایینی ئیسلامی كوردستان بڵاویكردەوە: بە ئامانجگرتنی كورد و خەڵكی مەدەنی هەردوو گەڕەكی شێخ مەقسود و ئەشڕەفییە لە حەلەب، بە هەموو پێوەرێك پێچەوانەی بنەماكانی ئایینی پیرۆزی ئیسلام و مافەكانی مرۆڤ و ڕێسا نێودەوڵەتیەكانە، هیچ یاسا و لۆژیكێك جگە لە دەمارگیری كوێرانە، ڕێگە بەو هێڕش و كوشتن و ستەمە گەورەیە نادات.

یەكێتی زانایانی ئایینی بەتوندی سەركۆنەی ئەو هێرشانە دەكات و هیوادارە كۆمەڵگەی نێودەوڵەتی لە ئاست ئەو هێرشكارییە بەرامبەر كورد بێ دەنگ نەبێت.

داواشى لە حكومەتی سوریا کردووە "ئەو شەڕو دەستدرێژییانە ڕابگرێت و له‌ بری گه‌مارۆ و گرژی و شه‌ڕ، دانوستان و ئاشتی و دیالۆگ بكاته‌ هه‌وێنی بونیادنانی سوریای نوێ و مافی پێكهاته‌كان له‌به‌رچاوبگرێت".

ماوەی چوار رۆژە هێرشی سەختی گروپە چەکدارەکانی سەر بە حکومەتی سوریا بۆ سەر گەڕەکە کوردنشینەکانى ئەشرەفیە و شێخ مەقسود بەردەوامە.