كیم جۆنگ ئوون بە سەرۆكی حزبی دەسەڵاتداری كۆریای باكوور هەڵبژێردرایەوە

پەیام

جارێكی دیكە (كیم جۆنگ ئون) بە كۆی دەنگی كۆنگرەی حیزبەكەی، بە سەرۆكی پارتی كرێكارانی دەسەڵاتدار لە كۆریای باكوور هەڵبژێردرایەوە.

ئاژانسی هەواڵی فەرمیی كۆریای باكو‌ور ڕایگەیاند، لە كۆنگرەی پارتی كرێكارانی دەسەڵاتداردا،"كیم جۆنگ ئون" جارێكی دیكە  بە كۆی دەنگ وەك سكرتێری گشتیی حزب هەڵبژێردراوەتەوە. بەشداربو‌وانی كۆنگرەكەش بە چەپڵەڕێزان و دروشمی "بژی سەركردە" پێشوازییان لە بڕیارەكە كرد.

لە وتارەكەیدا دوای هەڵبژاردنەوەی، كیم جۆنگ ئوون بەڵێنی دا تواناكانی بەرگریی وڵاتەكەی بەهێزتر بكات و پەرە بە چەكە ئەتۆمییەكان بدات بۆ ڕو‌وبەڕو‌وبو‌ونەوەی "هەڕەشە بەردەوامەكانی ئەمریكا".

كیم، دانی بەوەدا نا كە وڵاتەكەی ڕو‌وبەڕو‌وی ئاڵنگاریی گەورەی ئابو‌وری بو‌وەتەوە، بەڵام جەختی لەسەر سیاسەتی "پشتبەخۆبەستن" كردەوە بۆ تێپەڕاندنی سزاكانی ڕۆژئاوا و چارەسەركردنی قەیرانە ناوخۆییەكان.

پێش كیم، باوك و باپیریشی هەمان پۆستیان هەبووە، سەرۆكی حزب و سەرۆكی دەوڵەت بوون، شارەزایانیش پێیان وایە ئەم دووبارە هەڵبژاردنەوەیەی ناوبراو پەیامێكی ڕوونە كە (پیۆنگ یانگ) سازش لەسەر بەرنامە مو‌وشەكییەكەی ناكات و مل بۆ داوا و فشارەكانی ئەمریكا و ئەورووپا نادات.