کاردانەوەی ئێران بەرامبەر وتارەکەی ترەمپ

لە یەکەم کاردانەوەی فەرمیدا بەرامبەر وتاری ساڵانەی دۆناڵد ترەمپ، سەرۆکی ئەمریکا، ئیسماعیل بەقایی، وتەبێژی وەزارەتی دەرەوەی ئێران، ئیدارەی ئەمریکای بە «درۆزنی پیشەگەر» وەسف کرد. بەقایی ئاماژەی بەوە کرد کە واشنتۆن تەکنیکی پڕوپاگەندەی نازییەکان بەکاردەهێنێت بۆ دروستکردنی «ڕاستی زێڕین» و چەواشەکردنی ڕای گشتی، ئەمەش بە مەبەستی شەیتانکردنی گەلی ئێران و پاساودانی سیاسەتە شەڕانگێزەکانیان لە ناوچەکەدا.

لە بەرامبەردا، دۆناڵد ترەمپ لە بەردەم کۆنگرێسدا هەڕەشەی توندی ئاراستەی تاران کرد و ڕایگەیاند کە ڕێگە نادات ئێران ببێتە خاوەنی چەکی ئەتۆمی. ترەمپ کۆماری ئیسلامی بە «گەورەترین پاڵپشتیکاری تیرۆر» ناو برد و جەختی لەوە کردەوە کە تاران و بریکارەکانی تەنیا تیرۆر، مەرگ، ڕق و کینەیان بڵاو کردووەتەوە. ئەم وتارە لە کاتێکدایە کە ئەمریکا هێزێکی سەربازیی زەبەلاحی لە ڕۆژهەڵاتی ناوەڕاستدا کۆ کردووەتەوە.

سەرۆکی ئەمریکا لە وتارەکەیدا کۆمەڵێک تۆمەتی ئاراستەی ئێران کرد، لەوانە بەردەوامبوون لە پەرەپێدانی بەرنامەی ئەتۆمی و دروستکردنی مووشەکی بالیستی کە «بەمنزیکانە» دەگەنە خاکی ئەمریکا. هەروەها ئێرانی بە بەرپرسیار دانا لە کوژرانی سەربازان و هاووڵاتیانی مەدەنیی ئەمریکی. ئەمە لە کاتێکدایە کە میدیاکانی ناوخۆی ئێران ئاماژەیان بەوە کردووە کە تاران کار لەسەر پەرەپێدانی مووشەکێک دەکات کە توانای بڕینی مەودای نێوان ئێران و ئەمریکای باکووری هەبێت.

پەیوەست بە دۆخی ناوخۆیی ئێران، ترەمپ ڕەخنەی توندی لە حکوومەتی تاران گرت سەبارەت بە سەرکوتکردنی خۆپێشاندانەکانی مانگی ڕابردوو. ئەو ئاماژەی بەوە کرد کە ٣٢ هەزار کەس لەو خۆپێشاندانانەدا کوژراون، هەرچەندە ئەم ژمارەیە زۆر زیاترە لەو خەمڵاندنانەی کە لە لایەن ڕێکخراوە نێودەوڵەتییەکان و سەرچاوە گشتییەکانەوە بڵاو کراونەتەوە. گوتەبێژی وەزارەتی دەرەوەی ئێرانیش ئەم ژمارانەی بە «درۆی گەورە» وەسف کرد.

لە کۆتاییدا، ترەمپ بێزاریی خۆی لە شکستی دانوستانەکان دەربڕی و وتی کە ئێرانییەکان دەیانەوێت ڕێککەوتن بکەن، بەڵام ئامادە نین ئەو «وشە نهێنییە» بڵێن کە بریتییە لەوەی «هەرگیز نابینە خاوەنی چەکی ئەتۆمی». لە بەرامبەردا، ئێران جەخت دەکاتەوە کە لێکۆڵینەوە ئەتۆمییەکانی تەنیا بۆ مەبەستی ئاشتییانە و بەرهەمهێنانی وزەی مەدەنییە، هۆشداریشی دا کە نابێت کەس بەو بانگەشانەی ئەمریکا هەڵبخەڵەتێت.