پزیشكیان: چەندین دەوڵەت دەستیان بە هەوڵی نێوەندگیری كردووە

پەیام 

ئەمڕۆ هەینی، مەسعوود پزیشكیان، سەرۆككۆماری ئێران، ئاشكرای كرد "چەندین دەوڵەت بۆ هێوركردنەوەی دۆخەكە دەستیان بە هەوڵی نێوەندگیری كردووە".

پزیشكیان لە هەژماری فەڕمی خۆی لە پلاتفۆرمی ئێكس،  نووسیویەتی: "هەڵوێستی ئێمە ڕوونە؛ ئێمە پابەندین بە كاركردن بۆ بەدیهێنانی ئاشتییەكی بەردەوام لە ناوچەكەدا، بەڵام لەهەمانكاتدا لە بەرگریكردن لە كەرامەت و سەروەریی وڵاتەكەماندا هیچ دوودڵ نابین".

سەرۆككۆماری ئێران نووسیویشیەتی: هەر نێوەندگیرییەكی ڕاستەقینە دەبێت سەرەتا ئاڕاستەی ئەو لایەنانە بكرێت كە ئاگری ئەم قەیرانەیان هەڵگیرساندووە و بێڕێزییان بەرانبەر گەلی ئێران كردووە. 

ئەم لێدوانانە لە كاتێكدایە كە هێرشە یەك لە دوای یەكەكان لەنێوان ئێران و هاوپەیمانێتی (ئەمریكا و قەوارەی زایۆنی) بەردەوامە و تاران هەردوو لایەن تۆمەتبار دەكات بەوەی هێرشەكانیان بۆ سەر ئامانجە مەدەنییەكان و ژێرخانە خزمەتگوزارییەكان فراوان كردووە.