4 کاتژمێر پێش ئێستا
184 جار خوێنراوەتەوە
یەكێتی ئەورووپا و وڵاتانی كەنداو: تەنها بە دیپلۆماسی دەتوانرێت ناوچەکە ئارام بکرێتەوە
پەیام
یەكێتی ئەوروپا و ئەنجومەنی هاریكاری كەنداو جەختیان لە چارەسەری دیپلۆماسی بۆ ململانێكانی ڕۆژهەڵاتی ناوەڕاست كردەوە، هاوكات مافی یاسایی وڵاتانی ناوچەكەیان بۆ بەرگری لە خۆیان بەرامبەر هێرشەكانی ئێران دووپات كردەوە.
یەكێتی ئەوروپا و ئەنجومەنی هاریكاری كەنداو لە بەیاننامەیەكی هاوبەشدا داوایان كرد ململانێكانی ڕۆژهەڵاتی ناوەڕاست لە ڕێگەی دیپلۆماسی و گفتوگۆوە چارەسەر بكرێن.
هاوكات جەختیان لە پابەندیی خۆیان بە دۆزینەوەی ڕێگەچارەی ئاشتییانە بۆ قەیرانەكان كردەوە و ستایشی ڕۆڵی بونیاتنەرانەی سوڵتاننشینی عومانیان كرد لەم بوارەدا.
لە بەیاننامەكەدا هاتووە كە بەپێی ماددەی 51ی میساقی نەتەوە یەكگرتووەكان، وڵاتانی ئەنجومەنی هاریكاری كەنداوی مافی یاسایییان هەیە بۆ بەرگریی تاكەكەسی و بەكۆمەڵ لە خۆیان لە وەڵامی ئەو هێرشە چەكدارییانەی لەلایەن كۆماری ئیسلامی ئێرانەوە دەكرێنە سەریان.
ئەم پەرەسەندنانە و تێكچوونی دۆخی ئەمنی، ناوچەیەكی فراوانی گرتووەتەوە كە بریتین لە عێراق و ئیسرائیل، ئوردن، كوێت، بەحرەین، قەتەر، ئیمارات و عەرەبستانی سعوودی.
لە كۆتایدا یەكێتی ئەوروپا و وڵاتانی كەنداوی كۆك بوون لەسەر ئەوەی كە تەنها دیپلۆماسی دەتوانێت ڕێگری لە فراوانبوونی زیاتری بازنەی شەڕ بكات و ئارامی بۆ ئەو ناوچانە بگێڕێتەوە كە زیانیان بەركەوتووە.
لە تۆڕە کۆمەڵایەتیەکان شەیری بکە