چوارچێوەی هەماهەنگی داوا لە هەرێم دەکات بۆ هەناردەی نەوت پابەندی بڕیارەكانی بەغداد بن

پەیام

چوارچێوەی هەماهەنگیی كە لە زۆربەی لایەنە شیعەكان پێكدێت لە راگەیەنراوێكدا داوا لە حكومەتی هەرێمی كوردستان دەكات بۆ هەناردەكردنی نەوت لە جەیهانەوە پابەندی سیاسەت و بڕیارەكانی حكومەتی فیدراڵ بن.

ئەوەشى خستووەتەڕوو، بەڕێوەبردنی دۆسیەی نەوت پێویستە بەهاوبەشی بێت لەنێوان حكومەتی عیراق و هەرێمی كوردستاندا، بۆیە داوا دەكەن بۆ بەرژەوەندی نیشتمانیی كاری پێكەوەیی بكەن بۆ دەستپێكردنەوەی هەناردەكردنەوەی نەوت لە رێگەی بەندەری جەیهانەوە.

چوارچێوەی هەماهەنگیی جەختى لەوەشکردووەتەوە، پێویستە چارەسەركردنی كێشەكانی نێوان بەغداد و هەولێر بە رۆحیەتێكی هاوبەشی نیشتمانی و لێپرسراوێتییەوە ئەنجامبدرێت كە گەرەنتی پاراستنی سامانی نیشتمانی و پەرەپێدان و سەقامگیری ئابوری لە وڵاتدا بكات.