عێراق: لە ھێرشەکانی سەر حەشد ھەشت چەکدار کوژراون و حەوتی دیکەیش برینداربوون

په‌یام
وتەبێژی فەرماندەی گشتیی ھێزە چەکدارەکانی عێراق، سەباح نوعمان ڕاگەیاند لە ئاکامی ئەو ھێرشە ئاسمانییانەی کە دووشەممە کراونەتە سەر ھێزەکانی حەشدی شەعبی لە پارێزگای ئەنبار، ھەشت چەکداری حەشد کوژراون و حەوتی دیکەیش برینداربوون.
سەباح نوعمان لە ڕاگەیاندراوێکدا ئاماژەی بەوەداوە: "لە ئاکامی زنجیرەیەک دەستدرێژیی قێزەون و ترسنۆکانەدا، بازگەیەک و ژمارەیەک بارەگای حەشدی شەعبی لە قەزای قائیم ڕۆژئاوای پارێزگای ئەنبار کراونەتە ئامانج".
ڕاشیگەیاندووە کە لە ئاکامی ھێرشەکاندا، ھەشت چەکداری حەشدی شەعبی کوژراون و حەوتی دیکەیش برینداربوون.
ھەروەھا وتەبێژی فەرماندەی گشتیی ھێزە چەکدارەکانی عێراق، سەباح نوعمان باسی لەوەش کردووە: "بەھەموو شێوەیەک بە ئامانجگرتنی ھێزەکانی حەشدی شەعبی ڕەت دەکەینەوە".
سەباح نوعمان تیشکی خستووەتە سەر ئەوەیش کە بە ئامانجگرتنی ھێزە ئەمنییە فەرمییەکانی عێراق، دەستدرێژکردنە بۆ سەر سەروەریی عێراق.