28/03/2026
1082 جار خوێنراوەتەوە
جۆرێكی نوێی ئەنسۆلین کە هەفتەى جارێک بەکاردەهێنرێت دەخرێتە بازاڕەوە
پەیام
لە گۆڕانكارییەكی گەورە و مێژووییدا بۆ تووشبووانی نەخۆشی شەكرە، كۆمپانیای نۆڤۆ نۆردیسكی دانیماركی جۆرێكی نوێی ئەنسۆلینی بەناوی "ئاویكڵی" پەرەپێداوە.
ئەم دەرمانە كە بۆ یەكەمجارە لە جیهاندا بەرهەم دەهێنرێت، شێوازی چارەسەری نەخۆشییەكە بە تەواوی دەگۆڕێت. دەزگای خۆراك و دەرمانی ئەمریكی (FDA) بە فەرمی ڕەزامەندی لەسەر بەكارهێنانی ئەو دەرمانە دەربڕیوە تاكو بخرێتە خزمەت نەخۆشانەوە.
ئەم دەرمانە نوێیە بەتایبەتی بۆ تووشبووانی شەكرەی جۆری دووەم دروستكراوە و جیاوازییە سەرەكییەكەی لەوەدایە، تەنها هەفتانە یەك جار بەكاردەهێنرێت، لە كاتێكدا ئەنسۆلینەكانی پێشوو پێویستیان بە بەكارهێنانی ڕۆژانە هەبوو.
ئاویكڵی كاریگەرییەكەی بۆ ماوەی حەوت ڕۆژ دەمێنێتەوە، ئەوەش یارمەتی نەخۆشەكان دەدات باشتر كۆنترۆڵی ئاستی شەكرەی خوێنیان بكەن و لە ماندووبوونی دەرزی لێدانی ڕۆژانە ڕزگاریان ببێت.
كۆمپانیای نۆڤۆ نۆردیسك ڕایگەیاندووە: دەرمانەكە لە وڵاتانی یەكێتیی ئەورووپا و 13 وڵاتی دیكە پەسەند كراوە. بڕیاریشە لە ناوەڕاستی ئەمساڵدا بە فەرمی بخرێتە بازاڕەكانی جیهانەوە.
لە تۆڕە کۆمەڵایەتیەکان شەیری بکە