نەتەنیاهوو بڕیاری ئاگربەستی لە لوبنان نەخستە بەردەم ئەنجومەنی وەزیران

پەیام

نەتەنیاهوو بڕیاری ڕاگرتنی شەڕی لە لوبنان نەخستە دەنگدانەوە و ڕایگەیاند بەهۆی ڕەتكردنەوەی حزبوڵڵاوە لە ئێستادا هیچ ڕێككەوتنێك لە ئارادا نییە.

ڕۆژنامەی "یەدیعۆت ئەحرۆنۆت"ی ئیسرائیلی بڵاوی كردەوە، شەوی ڕابردوو ئەنجومەنی وەزیرانی بچووكراوەی ئیسرائیل هیچ دەنگدانێكی لەسەر بڕیاری ئاگربەست لە لوبنان ئەنجام نەداوە. 

بنیامین نەتەنیاهۆ، سەرۆك وەزیرانی ئیسرائیل بە ئەندامانی كابینەكەی ڕاگەیاندووە، دوای ئەوەی ئەمینداری گشتی حزبوڵڵا پێشنیارەكەی ڕەت كردووەتەوە، هیچ بڕیارێك بۆ دەنگدان نادات تا ئەو كاتەی گۆڕانكارییەك لە هەڵوێستەكاندا ڕوودەدات.

بەپێی زانیارییەكانی ڕۆژنامەكە، ڕاگەیاندنی هەواڵی كوژرانی ئەفسەرێكی ئیسرائیلی لە كاتی بەڕێوەچوونی كۆبوونەوەكەدا، ناڕەزایەتی وەزیرەكانی بەرانبەر بە بیرۆكەی ئاگربەست زیاتر كردووە. 

لە لایەكی دیكەوە، ئیتامار بن غەفیر، وەزیری ئاسایشی نەتەوەیی پێشنیاری بۆ نەتەنیاهۆ كردووە كە لەگەڵ كۆمەڵێك منداڵی ناوچەی "كریات شمونە" بچێتە واشنتۆن و داوا لە دۆناڵد ترەمپ بكات هێرش بكاتە سەر ناوچەی "زاحیە" لە بەیروت. ئەم ئاڵۆزییە ناوخۆییانە وای كردووە پرسی ئاگربەست بە هەڵپەسێردراوی بمێنێتەوە.