هێرشەکانى ئیسرائیل بۆسەر لوبنان بەردەوامە

بۆردوومانەکانی ئیسرائیل بۆ سەر باشووری لوبنان  کە بووەتە هۆی برینداربوون و کوژرانی ژمارەیەک هاووڵاتی و زیانی ماددی زۆر بەردەوامە و بەشێک لە وڵاتانیش داوا دەکەن هێرشەکان ڕابگیردرێت. 
بەرەبەیانی ئەمڕۆ پێنجشەممە، فڕۆکە جەنگییەکانی ئیسرائیل زنجیرەیەک هێرشی ئاسمانیی چڕیان کردە سەر گەڕەکی "شیاح" لە باشووری بەیرووت و چەندین شارۆچکە و گوندی سنووری لە باشووری لوبنان، ئەمەش هاوکات بوو لەگەڵ تۆپبارانێکی توندی سوپای ئیسرائیل بۆ سەر ناوچەی "حاریس". 
ئاژانسی نیشتمانیی لوبنان بۆ هەواڵ ڕایگەیاند هێرشە ئاسمانییەکان هەریەکە لە شارۆچکەکانی (کفرا، جومەیجمە، سەفەد بەتیخ، مەجدەل سەلم، دێرانتاڕ و دەوروبەری پردی قاسمەیەی) گرتووەتەوە. بەپێی ئامارە سەرەتاییەکان، بۆردوومانکردنی شارۆچکەی "عەباسییە" لە باشووری وڵاتەکە، بووەتە هۆی برینداربوونی ژمارەیەک کەس کە باری تەندروستیی هەندێکیان ناجێگیرە. 
لەلایەکی دیکەوە، بزووتنەوەی حزبوڵڵای لوبنانی لە بەیاننامەیەکدا جەختی لەوە کردەوە لە وەڵامی ئەوەی ناوی برد بە "پێشێلکارییەکانی ئیسرائیل بۆ ڕێککەوتنی ئاگربەست"، هێرشەکانیان بۆ سەر ئیسرائیل بەردەوام دەبێت. هەر لەو چوارچێوەیەدا، حزبوڵڵا ڕایگەیاند شەوی ڕابردوو بە ئامانجی تۆڵەکردنەوە، ناوچەی نیشتەجێبوونی "مەنارە" یان لە باکووری ئیسرائیل کردووەتە ئامانج.