ترەمپ: هیچ كات ڕێگە نادەین ئێران ببێتە خاوەنی چەكی ئەتۆمی

پەیام 

دۆناڵد ترەمپ سەرۆكی ئەمریكا ڕایگەیاند، ئێران ڕەزامەندیی نیشان داوە لەسەر ڕاگرتنی ‏بەرنامە ئەتۆمییەكەی بۆ ماوەی زیاتر لە 20 ساڵ، لەگەڵئەوەشدا هیچ كات ڕێگە نادەن ئێران ببێتە خاوەنی چەكی ئەتۆمی.

ترەمپ لە كۆشكی سپی ئاماژەی بەوە كرد، ئێستا گفتوگۆ لەسەر وردەكارییەكانی ‏ئەم دۆسیەیە دەكرێت و بڕیارە لە كۆتایی ئەم هەفتەیەدا هەموو وردەكارییەكان بە تەواوی ئاشكرا بكرێن. 

دۆناڵد ترەمپ جەختی كردەوە دانوستان لەگەڵ لایەنی ئێرانی بە باشی بەڕێوە دەچێت و ئەگەری هەیە خولێكی نوێی دانوستانی ڕاستەوخۆ ‏ئەنجام بدرێت.

هەروەها ئاماژەی بەوەدا، هەلێكی باش هەیە بۆ واژۆكردنی ڕێككەوتنێك، گەرەنتی ئەوە بكات تاران هیچ كات ‏چەكی ئەتۆمی بەدەست نەهێنێت، ئەمەش لە ژێر فشارە سیاسی و ئابوورییەكاندا.

سەرۆكی ئەمریكا دووپاتی كردەوە، ڕێگە نادەن ئێران ببێتە خاوەنی چەكی ئەتۆمی، چونكە ئەمە هەموو جیهان ڕووبەڕووی كێشەی گەورە دەكاتەوە.

‏وتیشی ئەمریكا پێداگرە لەسەر ڕێگری لەم مەترسییە و لە هەمان كاتدا گەشبینە بە گەیشتن بە ڕێككەوتنێكی گونجاو كە تاران لە چەكی ‏ئەتۆمی دوور بخاتەوە.