ترەمپ بۆ جاری 14هەمین باسى نزیكبوونەوەی كۆتاییهاتنی جەنگی ئێرانى کرد

پەیام

بۆ جاری 14هەمین، سەرۆكی ئەمریكا بانگەشەی نزیكبوونەوەی كۆتاییهاتنی جەنگی ئێران دەكات و دەڵێت: سەركەوتن نزیك بووەتەوە.

لە كۆبوونەوەیەكی جەماوەرییدا لە شاری لاس ڤێگاسی ویلایەتی نیڤادا، دۆناڵد ترەمپ، سەرۆكی ئەمریكا ڕایگەیاند: جەنگی ئێران لە لێواری كۆتاییهاتندایە و تەنها دوو مانگی خایاندووە.

ترەمپ ئاستی سوپای ئەمریكای لەم جەنگەدا بە بێوێنە و بەهێزترین سوپا لە جیهاندا وەسف كرد و جەختی كردەوە، كە "ئۆپڕاسیۆنە سەربازییەكان بە تەواوی بە باشی بەڕێوە چوون".

سەرۆكی ئەمریكا ئاماژەی بەوەش كرد "ئەم جەنگە بۆ ڕێگریكردن لە دەستڕاگەیشتنی تاران بە چەكی ئەتۆمی پێویست بووە"، هاوكات ستایشی ئێرانیشی كرد و وەك وڵاتێكی بەهێز و زیرەك و خاوەن شەڕكەری ئازا ناوی برد.

سەبارەت بە لایەنی سەربازی، ترەمپ دووپاتی كردەوە، كە تێكشكاندنی كەشتیگەلی ئێرانی ڕاستییە، وتیشی: یەكێك لە كەشتییە جەنگییەكانی ئێمەش ڕووبەڕووی 111 مووشەك بووەتەوە، بەڵام سەرجەمیان بە سەركەوتوویی بەرپەرچ دراونەتەوە.

ئەمەو تا ئەمڕۆ، سەرۆكی ئەمریكا لانی كەم 14 جار ئاماژە و لێدوانی سەبارەت بە نزیكبوونەوەی كۆتاییهاتنی جەنگی ئێران كردووە.