ئێران پێشنیازێکى لە ڕێگەى پاکستانەوە ئاڕاستەى ئەمریکا کردووە

پەیام
ماڵپەڕی ئاکسیۆس بڵاویکردەوە، ئێران لە ڕێگەی نێوەندگیریی پاکستانەوە پێشنیازێکی نوێی پێشکەشی ئەمریکا کردووە بۆ کردنەوەی گەرووی هورمز و کۆتاییهێنان بە جەنگ، لە بەرانبەر دواخستنی دانوستانە ئەتۆمییەکان و هەڵگرتنی گەمارۆی سەر بەندەرەکانی. 
بەپێی زانیارییەکانی ئاکسیۆس، پێشنیازەکەی تاران جەخت لەوە دەکاتەوە کە سەرەتا گەرووی هورمز بکرێتەوە و گەمارۆکانی ئەمریکا لەسەر بەندەرە ئێرانییەکان هەڵبگیرێت، لە بەرانبەردا پرسی دانوستانە ئەتۆمییەکان بۆ قۆناغێکی تری داهاتوو دوابخرێت. 
هاوکات چاوەڕوان دەکرێت دۆناڵد ترەمپ، سەرۆکی ئەمریکا، ئەمڕۆ دووشەممە لە "ژووری ئۆپەراسیۆنەکان" لەگەڵ تیمی باڵای ئاسایشی نەتەوەیی و سیاسەتی دەرەوەی وڵاتەکەی کۆببێتەوە. ئامانجی کۆبوونەوەکە تاوتوێکردنی چەقبەستوویی دانوستانەکان و دیاریکردنی هەنگاوەکانی داهاتووە لەم جەنگەدا. 
ئەم پێشهاتانە لە کاتێکدایە کە ترەمپ ڕۆژی یەکشەممە جەختی لەوە کردەوە کە جەنگی ئێران بەمزووانە کۆتایی دێت و ئەمریکا تێیدا سەرکەوتوو دەبێت.