ئاكسیۆس: واشنتن و تاران لە ڕێککەوتنێکی نوێ نزیک دەبنەوە

ماڵپەڕی ئاکسیۆس ئاشکرای کرد، واشنتن و تاران لە ڕێککەوتنێکی نوێ نزیک دەبنەوە کە کۆتاییھێنان بە گرژییەکان، هەڵپەساردنی پیتاندنی یۆرانیۆم، لابردنی سزاکان و کردنەوەی گەرووی هورمز لەخۆدەگرێت. 
ماڵپەڕی ئاکسیۆسی ئەمریکی لە زاری چەند بەرپرسێکی باڵای واشنتن و سەرچاوە ئاگادارەکانەوە بڵاوی کردەوە، کۆشکی سپی پێیوایە گەیشتووەتە قۆناغێکی یەکلاکەرەوە بۆ واژۆکردنی یاداشتنامەیەکی لێکتێگەیشتن لەگەڵ ئێران. ئەم ڕێککەوتنە کە تەنیا لە یەک لاپەڕە پێکدێت، وەک چوارچێوەیەک بۆ کۆتاییهێنان بە شەڕ و دەسپێکردنی دانوستانی وردتر دەربارەی بەرنامەی ئەتۆمی تاران دادەنرێت. 
بەپێی زانیارییەکانی ئاکسیۆس، واشنتن چاوەڕوانی وەڵامی تاران دەکات لەسەر چەند خاڵێکی سەرەکی لە ماوەی ٤٨ کاتژمێری داهاتوودا. ڕێککەوتنەکە بڕگەی هەستیاری تێدایە، لەوانە: پابەندبوونی ئێران بە ڕاگرتنی پیتاندنی یۆرانیۆم و نەناردنی بۆ دەرەوەی وڵات، لە بەرانبەردا ئەمریکا سزاکان هەڵدەگرێت و داراییە بلۆککراوەکانی ئێران ئازاد دەکات. هەروەها هەردوولا ڕێککەوتوون لەسەر لابردنی سنووردارکردنی هاتوچۆ لە گەرووی هورمز. 
یاداشتنامە پێشنیازکراوەکە کە لە لایەن ویتکۆف و کۆشنەرەوە لەگەڵ بەرپرسانی ئێران گفتوگۆی لەسەر دەکرێت، ١٤ خاڵ لەخۆدەگرێت. بڕیارە دانوستانەکان لە ئیسلام ئاباد یان جنێف بەڕێوەبچن و ماوەی ٣٠ ڕۆژ بخایەنن. لەو ماوەیەدا ئەمریکا گەمارۆ دەریاییەکان کەمدەکاتەوە، بەڵام هۆشداریی داوە ئەگەر دانوستانەکان شکست بهێنن، بژاردەی سەربازی و گەمارۆکان دەستپێدەکەنەوە. 
یەکێکی دیکە لە خاڵە جەوهەرییەکان، گواستنەوەی یۆرانیۆمی پیتێنراوی ئێرانە بۆ دەرەوەی وڵات کە ڕەنگە ئەمریکا بێت، لەگەڵ بەڵێنی تاران بۆ دانەخستنی دامەزراوە ئەتۆمییەکان لەژێر زەویدا. سەرچاوەکان ئاماژە بۆ ئەوە دەکەن هەرچەندە هێشتا ڕێککەوتنی کۆتایی واژۆ نەکراوە، بەڵام ئەمە نزیکترین دەرفەتە بۆ گەیشتن بە چارەسەر لە دوای دەستپێکردنی شەڕەوە.