ئەمریکاو تورکیاو قەتەر بانگهێشتی عەلی زەیدی بۆ وڵاتەکانیان دەكەن

پەیام

سەرۆككۆماری توركیا پیرۆزبایی ڕاسپاردنی پێكهێنانی كابینەی حكوومەتی لە سەرۆكوەزیرانی ڕاسپێردراوی عێراق كرد، بە فەرمییش بانگهێشتی كرد بۆ سەردانی وڵاتەكەی.

فەرمانگەی پەیوەندییەكانی سەرۆكایەتیی توركیا ڕایگەیاند: ڕەجەب تەیب ئەردۆغان سەرۆككۆماری توركیا لە پەیوەندییەكی تەلەفۆنیدا لەگەڵ عەلی زەیدی، جەختی لەوە كردووەتەوە، كە ئەنقەرە خوازیاری بەهێزكردنی هاوكارییە ستراتیژی و دامەزراوەییەكانە لەگەڵ بەغداد. 

سەرۆككۆماری توركیا ئاماژەی بەوە كرد كە وڵاتەكەی سوورە لەسەر بەرەوپێشبردنی پەیوەندییەكان لە چەندین دۆسیەی گرنگدا، لەوانە پڕۆژەی ڕێگەی گەشەپێدان، بەرەنگاربوونەوەی تیرۆر، پیشەسازیی بەرگری، وزە و گواستنە. هەروەها بە پێی ڕاگەیەنراوەكە ئاماژەشی كرد كە پێكهاتەی توركمان ڕەگەزێكی گرنگ و تایبەتن بۆ پتەوكردنی برایەتیی نێوان هەردوو وڵات.

لای خۆیەوە، نووسینگەی ڕاگەیاندنی سەرۆكوەزیرانی ڕاسپێردراو بڵاوی كردەوە: زەیدی بانگهێشتنامەیەكی فەرمیی لە ئەردۆغانەوە پێ گەیشتووە تاوەكو لە نزیكترین كاتدا سەردانی ئەنقەرە بكات. 

ئەم هەنگاوەی توركیا هاوكاتە لەگەڵ بانگهێشتێكی هاوشێوەی ئەمیری قەتەر كە هەر ئەمڕۆ بۆ عەلی زەیدی نێردراوە، پێشتریش سەرۆكی ئەمریكا بانگهێشتی سەردانی وڵاتەكەی كرد.