1 کاتژمێر پێش ئێستا
56 جار خوێنراوەتەوە
قالیباف بە نوێنەری ئێران بۆ سەرپەرشتی كاروباری چین دەستنیشان كرا
پەیام
ئێران محەمەدباقر قاڵیبافی بە فەرمی وەك نوێنەری خۆی بۆ كاروباری چین دیاری كرد، ناوبراویش دەڵێت: جیهان لەبەردەم گۆڕانكارییەكی مێژوویی گەورەدایە.
ئاژانسی تەسنیمی ئێرانی ئاشكرای كرد "لەسەر ڕاسپاردەی مەسعوود پزیشكیان، سەرۆككۆماری ئێران، محەممەد باقرقاڵیباف سەرۆكی ئەنجومەنی شورای كۆماری ئیسلامیی ئێران و سەرۆكی شاندی دانوستانكار لەگەڵ ئەمریكا سەرپەرشتی پەیوەندییەكانی لەگەڵ وڵاتی چین-ی پێ سپێردراوە".
سەرەڕای ڕاگەیاندنی بڕیارەكە، بەڵام زانیاریی ئەوە نەخراوەتە ڕوو كە قالیباف بە وەرگرتنی پۆستە نوێیەكەی لە سەرۆكایەتی پەڕلەمان دەمێنێت، یان نا؟
پێشتریش هەر یەك لە عەلی لاریجانی و عەبدولڕەحمان فەزڵی پۆستی نوێنەری تایبەتی ئێران بۆ كاروباری چین بوون.
لە لایەكی دیكەوە و بەر لە ڕاگەیاندنی ئەو بڕیارە بە ئاشكرا، قاڵیباف لە هەژماری فەڕمی خۆی لە تۆڕی كۆمەڵایەتی "ئێكس" نووسی: جیهان لە لێواری سیستمێكی نوێدایە و هاوشێوەی وتەكانی شی جین پینگ، سەرۆكی چین، جیهان وەرچەرخانێكی بێوێنە بەخۆیەوە دەبینێت.
لە نووسینەكەیدا قالیباف ڕایشیگەیاند: 70 ڕۆژ بەرگریی گەلی ئێران لە بەرانبەر فشارەكاندا، ڕۆڵی سەرەكی هەبووە لە خێراكردنی ئەم گۆڕانكارییانە و گەیشتن بە ئایندەیەك كە تێیدا پێگەی وڵاتانی باشووری جیهانی لە هەموو جەمسەرەكان بەهێزتر دەبێت.
پێشتریش سەرۆكی پەڕلەمانی ئێران هۆشداری دا كە ئێران بۆ هەموو بژاردەكان ئامادەیە و بە وەڵامی توند دوژمن تووشی شۆك دەكەن.
ئەم هەڵوێستە نیشانەی هەوڵی ئێرانە بۆ پتەوكردنی هاوپەیمانییەكانی لەگەڵ چین و ڕووسیا بە مەبەستی ڕێكخستنەوەی سیستمێكی نوێی جیهانی و كۆتاییهێنان بە تاكجەمسەریی ئەمریكا.
لە تۆڕە کۆمەڵایەتیەکان شەیری بکە