پێش 3 هەفتە
329 جار خوێنراوەتەوە
ئەمریکا و ئێران مەرج بۆ ڕێككەوتن و دەستپێکردنەوەى دانوستان دادەنێن
پەیام
ئەمریكا پێنج مەرجی قورسی بۆ ڕێككەوتن و كۆتاییهێنان بە جەنگ ئاراستەی ئێران كردووە، لە بەرانبەردا بەرپرسێكی ئێران ئاشكرای كرد "ڕابەری باڵای ئێران حەوت مەرجی وەك هێڵی سوور بۆ گفتوگۆكان داناوە".
بەپێی هەواڵێكی ئاژانسی "فارس" ی ئێرانی، ئەمریكا لە وەڵامە فەرمییەكەیدا كە ڕادەستی نێوەندگیری پاكستانی كردووە، ڕایگەیاندووە "قەرەبووی زیانەكانی جەنگ ناداتەوە و ڕێگەش بە ئازادكردنی سەدا 25ی پارە بلۆككراوەكانی ئێران نادات".
هەروەها واشنتۆن داوای كردووە ئێران تەواوی كۆگاكانی یۆرانیۆمی پیتێنراوی ئاستبەرزی خۆی ڕادەست بكات و تەنیا ڕێگە بە كاركردنی یەك دامەزراوەی ئەتۆمی لە تەواوی ئەو وڵاتەدا دەدرێت.
سەبارەت بە ڕاگرتنی جەنگ، ئەمریكا جەختی كردووەتەوە، كە كۆتاییهێنان بە جەنگ لە هەموو بەرەكاندا "مەرجدارە" و بەستراوەتەوە بە ئەنجامدانی دانوستانەكان و بەرەوپێشچوونیان، نەك پێشوەختە جەنگ بوەستێت.
لە بەرانبەردا محەمەد ساڵح جوكار سەرۆكی كاروباری ناوخۆ لە پەرلەمانی ئێران ڕایگەیاند: تاران لەسەر ڕێنمایی ڕێبەری باڵا حەوت مەرجی دیاری كردووە، ئەوانیش بریتین لە: هەڵگرتنی هەموو سزاكان، ئازادكردنی پارە بلۆككراوەكان، پێدانی قەرەبووی تەواوی زیانەكان، كشانەوەی هێزە شەڕكەرەكانی ئەمریكا لە ناوچەكە، ڕاگرتنی هێرشەكان، داننان بە مافی پیتاندنی یۆرانیۆم و ڕێكخستنی هاتوچۆی گەرووی هورمز بە هەماهەنگی هێزە چەكدارەكانی ئێران.
لە تۆڕە کۆمەڵایەتیەکان شەیری بکە