لە سبەینێوە مەراسیمەکانى حەج دەستپێدەکات

پەیام

سبەینێ 25ى 5ى 2026، کە 8ی مانگی زیلحیججەیە، یەکەمین ڕۆژی سەرەکیی مەراسیمەکانى حەج دەستپێدەکات کە بە "ڕۆژی تەروییە" (یوم الترویة) دەناسرێت. لەم ڕۆژەدا حاجیان ڕوو لە خاکى "مینا" دەکەن.

لە سبەینێوە کە ڕۆژی تەروییە هەنگاوەكانی بەجێهێنانی فەریزەی پێنجەمی ئیسلامەتی كە حەجە، دەستپێدەکات و حاجییان دەچنە خاکى مینا و شەو لەوێ دەمێننەوە و نوێژەکانیان بە کورتکردنەوە و بێ کۆکردنەوە ئەنجامدەدەن.

خاکى مینا نزیکەی 7 کیلۆمەتر لە مەککەوە دوورە، حاجییان لە رۆژى تەروییە واتە لە پێش نیوەڕۆی ڕۆژی 8ی زیلحیججە ڕووى تێدەکەن و تا بەرەبەیان لێى دەمێننەوە، دواتر لە دواى خۆرهەڵاتن و لەگەڵ دەستپێکردنى رۆژى 9ى زیلحیججە کە رۆژى عەرەفەیە حاجییان دەچنە خاکى عەرەفە و گەورەترین ڕوکنى حەج بە ئەنجام دەگەیەنن.