ئەمڕۆ حاجییان گەورەترین ڕوکنی حەج بەجێدەهێنن

پەیام

 ٨ی زولحیججە، زیاتر لە ملیۆنێک حاجی بە مەبەستی بەجێهێنانی "ڕۆژی تەڕوییە" و دەستپێکردنی ڕێوڕەسمی حەج لە نێو ئامادەکارییەکی بەرفراواندا، دەستیان بە رۆیشتن بەرەو مینا کرد و ئەمڕۆش حاجییان گەورەترین ڕوکنی حەج بەجێدەهێنن

حاجییان لە مینا نوێژەکانیان بە کورتی (قەسر)، وەک پەیڕەوکردنێک لە سوننەتی پێغەمبەر (د. خ) ئەنجام دا، لەو وێستگەیەدا بە یەک دەنگ و بە تەلبیەی "لبیک اللهم لبیک" ـیان کرد، ئەمڕۆش لەگەڵ هەڵاتنی خۆردا کە ٩ی زولحیججەیە، بەرەو عەرەفات بەڕێکەوتن و گەورەترین روکنى حەج کە وەستانە لەسەر کێوی عەرەفە بەجێدەهێنن.

لەگەڵ هاتنی کاتی نیوەڕۆدا، وتاری ڕۆژی عەرەفە پێشکەش دەکرێت کە تایبەتە بە ڕێنوێنی و بیرخستنەوەی فەزڵەکانی ئەم ڕۆژە پیرۆزە. پاشان حاجیان بەپێی سوننەتی پێغەمبەر (د. خ) نوێژەکانی نیوەڕۆ و عەسر بە شێوازی کۆکردنەوە و کورتکردنەوە (جمع وقصر) ئەنجام دەدەن. 
لەگەڵ ئاوابوونی خۆری نۆیەم ڕۆژی مانگی زیلحیجەشدا، لێشاوی حاجیان ڕوو لە مەشعەری مزدلفە دەکەن و لەوێش بە هەمان شێواز نوێژەکانی مەغریب و عیشا پێکەوە و بە کورتی جێبەجێ دەکەن.