سعودییە: قۆناغی یەکەمی پلانی ئەمنیی حەج بە سەرکەوتوویی جێبەجێ کراوە

پەیام
بریکاری وەزارەتی ناوخۆی سعودیە ڕایگەیاند قۆناغی یەکەمی پلانی ئەمنیی حەج بە سەرکەوتوویی جێبەجێ کراوە و گەیشتنی زیاتر لە ملیۆنێک و نیو حاجی دەرەوەی وڵاتەکە بۆ جێبەجێکردنی ڕێوڕەسمەکان بەردەوامیی هەیە. 
وتەبێژی وەزارەتی ناوخۆی سعودیە، عەمید تەڵال بن شەلهوب لە کۆنفرانسێکی ڕۆژنامەوانیدا ڕایگەیاند، قۆناغی یەکەمی پلانی ئەمنیی حەج بە هاوئاهەنگیی تەواو لەگەڵ سەرجەم دەزگاکاندا بە ئارامی بەڕێوەچوو. ئاماژەی بەوەش کرد کە پڕۆسەی گەیشتنی حاجیان بۆ شوێنی نیشتەجێبوونیان لە "مینا" بە شێوازێکی زۆر ڕێکوپێک و بێ لۆد لە لایەنی هاتوچۆوە کۆتایی هاتووە، ئەمەش وەک ئامادەکارییەک بۆ بەڕێکەوتنیان بەرەو کێوی عەرەفە. 
لە لایەکی دیکەوە و لە هەمان کۆنفرانسدا، عەبدولعەزیز عەبدولباقی وتەبێژی وەزارەتی تەندروستیی سعودیە جەختی کردەوە سیستمی تەندروستیی وڵاتەکەی بە بەرزترین ئاستی ئامادەییەوە بەردەوامە لە جێبەجێکردنی پلانە مەیدانی و خۆپارێزییەکان، ئەمەش لە چوارچێوەی سیستمێکی نیشتمانیی گشتگیردا بۆ ئەوەی حاجیان بتوانن بە شێوازێکی ئارام و ئاسان فەریزەی حەج بەجێبگەیەنن. 
مەراسیمی حەج پێنج ڕۆژ دەخایەنێت و گرنگترین قۆناغیشی وەستانە لەسەر کێوی عەرەفە، پاشان مانەوە لە موزدەلیفە و ڕەجمکردنی شەیتان (جەمەرات)، لەگەڵ ئەنجامدانی تەواف و تەوافی ماڵاوایی. ئەمەش لە کاتێکدایە کە دەسەڵاتدارانی سعودیە پێشتر ڕایانگەیاندبوو کە زیاتر لە  ملیۆن و نیوێک حاجی لە دەرەوەی شانشینی سعودیەوە بۆ حەجی ئەمساڵ گەیشتوونەتە وڵاتەکە.