فڕۆکە جەنگییەکانى ئەمریکا چەند پێگەیەکیان لە باشووری ئێران بە ئامانج گرت

پەیام
فەرماندەیی ناوەندیی ئەمریکا (سێنتکۆم) ڕایگەیاند، هێزەکانیان لە هێرشێکدا چەند پێگەیەکی مووشەکی و بەلەمێکی ئێرانییان لە باشووری ئەو وڵاتە کردووەتە ئامانج، هاوکات واشنتۆن کاریگەریی ئەم هێرشانە لەسەر دانوستانەکان بەدوور دەزانێت. 
ئەم ڕاگەیاندراوەی سێنتکۆم دوای ئەوە هات کە دەنگی چەندین تەقینەوە لە ناوچە جیاجیاکانی باشووری ئێران و نزیک گەرووی هورمز بیسترا، لەوانەش شارەکانی بەندەر عەباس، سیریک و جاسک. میدیاکانی ئێرانیش پشتڕاستیان کردەوە کە فڕۆکە جەنگییەکانی ئەمریکا هێرشیان کردووەتە سەر چەند بەلەمێکی ئێرانی لە باشووری دوورگەی لارک لە گەرووی هورمزدا. 
تیم هوکینز، وتەبێژی فەرماندەیی ناوەندیی ئەمریکا ڕایگەیاند، هێزەکانیان بە مەبەستی پاراستنی سەربازەکانیان لەو هەڕەشە ڕاستەوخۆیانەی لە ناوچەکەدا ڕووبەڕوویان دەبێتەوە، ئەم هێرشە بەرگرییانەیان ئەنجامداوە. ناوبراو ئاماژەی بەوەش کرد، ئەو شوێنانەی کراونەتە ئامانج پێگەی هاوێشتنی مووشەک و چەند بەلەمێکی ئێرانی بوون کە هەوڵی چاندنی مینیان داوە. 
سەرەڕای ئەم ئاڵۆزییە سەربازییانە، مارکۆ ڕوبیۆ، وەزیری دەرەوەی ئەمریکا، کاریگەری ئەم پێکدادانانەی لەسەر پڕۆسەی دانوستانەکان ڕەت کردەوە.