دەستگیرکردنی چەند گرووپێکی سەر بە ئۆکرانیا لە عێراق

قاسم عەبوودی ڕاوێژکاری ئاسایشی نیشتمانیی عێراق ڕایگەیاند، کە چەند گرووپێکیان دەستگیر کردووە کە بۆ بەرژەوەندیی وڵاتی ئۆکرانیا، هێرشیان کردووەتە سەر چەندین دامەزراوە لە ناو خاکی عێراقدا. 
 عەبوودی لە لێدوانێکی تەلەفزیۆنیدا ئاشکرای کرد، کە تیمە هەواڵگرییەکانیان دەستوەردانی ئۆکرانیایان لە کاروباری عێراقدا ئاشکرا کردووە و تۆمەتبارەکانیش دانیان بەوەدا ناوە کە بۆ بەرژەوەندیی کیێڤ کار دەکەن. ناوبراو ئاماژەی بەوە دا کە ئەم گرووپانە چەندین پڕۆسەی بۆردوومانیان لە ناوخۆی وڵاتدا جێبەجێ کردووە، بەڵام تا ئێستا وردەکاریی ئەو شوێنانەی کراونەتە ئامانج و ئەگەری ئەنجامدانی هێرش لە دەرەوەی سنوورەکانی عێراق دیار نەکراون. 
ڕاوێژکاری ئاسایشی نیشتمانی جەختی کردەوە دۆسیەی ئەم هێرشانە ئاڵۆزە و پێویستی بە لێکۆڵینەوەی زیاتر هەیە تاوەکو ئاڕاستەی کارەکان و لایەنە تێوەگلاوەکان بە تەواوی ڕوون ببنەوە. قاسم عەبوودی دووپاتی کردەوە ڕووبەڕووبوونەوەی ئەم ئاڵنگارییە ئەمنییە لە پێشینەی کارەکانیانە و حکوومەت ڕێکاری پێویست دەگرێتە بەر بۆ ڕێگریکردن لە هەر جۆرە دەستوەردانێکی دەرەکی کە سەقامگیریی عێراق بخاتە مەترسییەوە.