بەرشەلۆنە گرێبەستکردنی لەگەڵ هێرشبەرێکی گەورە ڕەت کردووەتەوە

پەیام سپۆڕت - مەڕوان تاڵیب

یانەی بەرشەلۆنە گرێبەستکردنی لەگەڵ ڤیکتۆر ئۆسیمینی نەیجیری ڕەت کردووەتەوە.

 ڕۆژنامەی "سپۆرت" ئاماژەی بەوە کردووە، لە ڕێگەی نێوەندگیرەکانەوە تواناکانی ڤیکتۆر ئۆسیمینی یاریزانی یانەی گەڵەتەسەرای پێشنیار کراوە بۆ بەرشەلۆنە و ئەم هەنگاوەش گوزارشت لەو بایەخە بەردەوامە دەکات کە پڕۆژەکەی یانە کەتەلۆنییەکە لای یاریزانانی ئەورووپا دروستی کردووە.

سەرچاوەکە ڕوونی کردووەتەوە، سەرەڕای بەهرە گەورەکەی ئەم یاریزانە نەیجیرییە، بەڵام بەرشەلۆنە گرێبەستکردن لەگەڵ ئەو وەک کارێکی لەپێشینە بۆ بەهێزکردنی هێڵی هێرشبەرییەکەی نابینێت.

ڕۆژنامەکە ئاماژە بەوەش دەکات، بەرشەلۆنە بایەخ بە تواناکانی ئۆسیمین دەدات و دەزانێت کە هێرشبەرێکی ئاستبەرزە لە بازاڕدا، بەڵام ئەو پلانەی "دیکۆ"ـی بەڕێوەبەری وەرزشی پێش چەند مانگێک داڕێژراوە، وەک خۆی ماوەتەوە و نەگۆڕاوە و هێشتا جولیان ئالڤارێز ئامانجی سەرەکی بلاوگرانایە و گرێبەستکردن لەگەڵ ئۆسیمین لە پلانەکانی دیکۆدا نییە.