سکالۆنی: هیچ بیانوویەک بۆ شکستەکەمان ناهێنمەوە

پەیام سپۆڕت - دروود محەمەد

لیۆنێل سکالۆنی ڕاهێنەری هەڵبژاردەی ئەرجەنتین دڵتەنگیی خۆی دەربڕی، بەڵام جەختی کردەوە کە شانازی بە یاریزانەکانییەوە دەکات و هیچ بیانوویەک بۆ شکستەکەیان ناهێنێتەوە.

لە لێدوانێکدا دوای شکستکەیان سکالۆنی وتی: ئێمە لە کاتی بردنەوەدا گەورەین، دەبێت لە کاتی شکستیشدا بە هەمان شێوە گەورە بین. یارییەکەمان دۆڕاند و بەرپرسیارێتییەکەی هەڵدەگرین، بەڵام ئەمە بەو مانایە نییە کە هەموو ئەو ماندووبوونەی بۆ گەیشتن بە ئێرە کێشاومانە، لەبیری بکەین.

ڕاهێنەرەکەی تانگۆ وتیشی: سوپاسی یاریزانەکانم و هاندەران دەکەم، ئێمە هەموو توانای خۆمان بەکارهێنا کاتێک یاریزانەکان هەموو شتێک دەبەخشن، دەبنە نموونەیەکی نایاب بۆ جەماوەر و بۆ وڵاتەکەمان.

لە کۆتایدا سکالۆنی دەڵێت: هیچ بیانوویەک بۆ شکستەکەمان ناهێنمەوە و من یادی خاوەن پلەی دووەمەکان دەکەمەوە، چونکە گەیشتن بە ئێرە پێویستی بە هەوڵێکی بێسنوور هەیە، ئارەزوومان دەکرد ببەینەوەو ببینە پاڵەوان، بەڵام تاکە وشەیەک کە ئێستا هەمبێت سوپاسگوزاری و خەمە، کاتێک یاریزانەکان بەم شێوەیە هەموو توانای خۆیان پێشکەش دەکەن، زۆر قورسە لۆمەیان بکەم.