بەرشەلۆنە لەگەڵ یاریزانێک گەیشتە ڕێککەوتن

پەیام سپۆڕت - مەڕوان تاڵیب

یانەی بەرشەلۆنە لەگەڵ جواو کانسێلۆ گەیشتە ڕێککەوتن بۆ مانەوە و هیلالیش داواکارییەکانی کەم دەکاتەوە.

 ڕۆژنامەی "مۆندۆ دیپۆرتیڤۆ" ئاماژەی بەوە کردووە کە جواو کانسێلۆ دەیەوێت بە شێوەیەکی هەمیشەیی پەیوەندی بە بلاوگراناوە بکات دوای کۆتایی هاتنی بەشدارییەکەی لەگەڵ هەڵبژاردەی پورتوگال لە مۆندیالدا.

سەرچاوەکە ڕوونی کردووەتەوە بەرشەلۆنە پێشوەختە لەگەڵ یاریزانەکە گەیشتووەتە ڕێککەوتن لەسەر گرێبەستێک بۆ ماوەی دوو وەرز و کانسێلۆ وەرزی ڕابردوو بە شێوەی خواستن لە هیلالەوە لە بەرشە یاری کردووە.

لە ئێستادا گفتوگۆکان لەگەڵ یانەی هیلال چڕبوونەتەوە بۆ کۆتاییهێنان بە گرێبەستەکە، دوای ئەوەی یانە سعوودییەکە داواکارییە داراییەکانی لە 15 ملیۆن یۆرۆوە بۆ نزیکەی 10 ملیۆن یۆرۆ (بە گۆڕانکارییەکانیشەوە) کەمکردووەتەوە.

کانسێلۆ بۆ ماوەی سێ هەفتە پشووی وەرگرتووە، هیوادارە پێش کاتی گەڕانەوەی بۆ مەشقەکانی هیلال گرێبەستەکەی یەکلا ببێتەوە، تاوەکو ڕاستەوخۆ بچێتە بەرشەلۆنە و ڕەنگە پەیوەندی بە کەمپی مەشقی تیپەکەوە لە ئینگلتەرا بکات.