ئەمریکا چەند پێگەیەکی لە باشووری ئێران بۆردومان کرد

پەیام
فەرماندەیی ناوەندیی سوپای ئەمریکا (سێنتکۆم) ڕایگەیاند هێزەکانیان لە وەڵامی هێرشێکی تاران بۆ سەر کەشتییەکی بازرگانی لە گەرووی هورمز، چەند پێگەیەکی سەربازیی ئێرانیان لە باشووری ئەو وڵاتە بۆردومان کردووە. 
بەگوێرەی ڕاگەیەندراوێکی فەرماندەیی ناوەندیی ئەمریکا، فڕۆکە جەنگییەکانیان کۆگاکانی موشەک و فڕۆکەی بێفڕۆکەوان و چەند وێستگەیەکی ڕاداری کەناراوەکانی ئێرانیان کردووەتە ئامانج. واشنتۆن ئەم هێرشانەی وەک وەڵامێکی توند بۆ سەرپێچییەکانی ئێران و هێرشی  سوپای ئەو وڵاتە بۆ سەر کەشتییە بازرگانییەکە لەقەڵەمداوە و جەختی لەوە کردووەتەوە کە هێزەکانیان لە ناوچەکەدا لە ئامادەباشیدان بۆ پاراستنی ئاسایشی دەریاوانی و جێبەجێکردنی ڕێککەوتنەکان. 
لەم چوارچێوەیەدا، سوپای پاسدارانی ئێران لە بەیاننامەیەکدا ڕایگەیاند هێزەکانی ئەمریکا هێرشیان کردووەتە سەر دوورگەی سیریک و هێزەکانی ئەوان ڕووبەڕووی هێرشەکە بوونەتەوە. دوابەدوای ئەم ئاڵۆزییانەش، تۆڕی هەواڵی "سی ئێن ئێن" لە زاری بەرپرسێکی ئەمریکییەوە بڵاویکردەوە کە لە ئێستادا هێرشە ئاسمانییەکانی ئەمریکا بۆ سەر پێگەکانی ئێران کۆتاییان هاتووە.