له‌ هێرشێكدا له‌ پاوه‌ی ڕۆژهه‌ڵاتی كوردستان دوو كه‌س كوژران

گرووپێکی چەکداریی نوێ بە ناوی "خۆری هیوا" هێرشی کردە سەر ئەندامانی سوپای پاسداران لە شاری پاوە و لە ئەنجامدا دوو پاسدار كوژران و دوانی دیكه‌ش برینداربوون.
ئێوارەی دووشەممە لە گەڕەکی میرئاوای شاری پاوەی سەر بە پارێزگای کرماشان، هێرشێکی چەکداری کرایە سەر ئەندامانی سوپای پاسداران و لە ئەنجامدا دوو کەس بە ناوەکانی خالید خالیدی و بورهان کریسانی کوژران. هەر لەو ڕووداوەدا، دوو چەکداری تری سوپا بە ناوەکانی کامیل شەبرەنگ (کەمال هەجیجی) و کەماڵ عەبدی بە سەختی بریندار بوون؛ ئاژانسی تەسنیمی سەر بە سوپای پاسداران هێرشەکەی وەک "کردەوەیەکی تیرۆریستی" ناوبرد و ڕایگەیاند کە هێزە ئەمنییەکان خەریکی لێکۆڵینەوەی وردن بۆ دەرخستنی ملابساتەکانی ئەم ئۆپەراسیۆنە سەربازییەی کە ناوچە سنوورییەکانی ڕۆژئاوای ئێرانی هەژاندووە.
لەلایەکی تریشەوە، گرووپێکی تازە دامەزراو بە ناوی "خۆری هیوا" لە بەیاننامەیەکی فەرمیدا بەرپرسیارێتیی هێرشەکەی گرتە ئەستۆ و ڕایگەیاند کە ئامانجیان کوشتنی ئەو چەکدارانەی سوپای پاسداران بووە. بەپێی ڕاپۆرتی ڕێکخراوی مافی مرۆڤی هەنگاو، ئەم ئۆپەراسیۆنە لە کاتێکدایە کە ڕێکارە ئەمنییەکان لە ناوچەکەدا توندتر کراونەتەوە، و ئەم گرووپە نوێیە دەیەوێت لە ڕێگەی ئەم جۆرە چالاکییانەوە ئاڕاستەیەکی نوێی خەبات لە دژی تاران دەستپێبکات. ئەم پەرەسەندنە ئەمنییە نیشانەی تێکچوونی دۆخی ناوچە کوردنشینەکانە و مەترسیی زیاتربوونی پێکدادانە چەکدارییەکان لە ئایندەیەکی نزیکدا زیاد دەکات.