پلەکانى گەرما لە هەرێم بۆ سەرووى 50 پلە بەرزدەبنەوە

پەیام 

بەڕێوەبەرایەتیی گشتیی بەرگریی شارستانیی هەرێمی كوردستان هۆشداری لە شەپۆلێكی توندی گەرما دەدات كە لە رۆژانى داهاتوودا ڕوو لە هەرێم دەکات و پلەكانی دەگەنە 47 تا 55 پلەی سیلیزی، بۆ ئەو مەبەستەش چەند ڕێنماییەكی بلاو كردەوە.

بۆ ڕێگریكردن لە مەترسییەكان، داوا لە شۆفێران كراوە كەرەستەكانی چەرخ، عەتر، سپرا و پاتری لەناو ئۆتۆمبێلدا جێ نەهێڵن؛ هەروەها پەنجەرەكان كەمێك بە كراوەیی بهێڵنەوە، تانكی بەنزین بە تەواوی پڕ نەكەن و شۆفێریی كاتەكانی بەیانی و نیوەڕۆ كەم بكەنەوە.

لەسەر ئاستی ناوماڵ و خۆپارێزیی كەسی، ڕێنمایی هاوڵاتیان كراوە كە بوتڵی غاز لەبەر خۆر دانەنێن، بۆ كەمكردنەوەی لۆدی كارەبا تەنها ئەو ژوورانە سارد بكەنەوە كە دانیشتنی تێدایە، ئاو زۆر بخۆنەوە و ئاگاداری مار و دووپشك بن. لە كۆتاییشدا جەختكراوەتەوە كە لە كاتژمێر 10ی بەیانی تا 3ی دوای نیوەڕۆ بە هیچ شێوەیەك لەبەر تیشكی ڕاستەوخۆی خۆردا نەمێننەوە.