بۆسنە.. ڕوفاتی 10 قوربانی دیکەى كۆمەڵكوژیی سێبرێنیتسا بەخاكسپێردرا

پەیام   

ڕوفاتی 10 قوربانی دیكەی مسوڵمانی كۆمەڵكوژیی سێبرێنیتسا لە بۆسنەوهەرسك بەخاك سپێردران، بەمەش كۆی قوربانییە بەخاكسپێردراوەكان بۆ نزیك بە حەوت هەزار بەرز بووەوە.

ئەمڕۆ، شەممە، لە ڕێوڕەسمێكدا لە گۆڕستانی پۆتۆچاری لە ڕۆژهەڵاتی بۆسنەوهەرسك، ڕوفاتی 10 قوربانی دیكەی كۆمەڵكوژییەكەی ساڵی 1995ی شاری سێبرێنیتسای مسوڵماننشین بەخاك سپێردران كە تازە ناسنامەیان دیاریكرابوو. بەمەش ژمارەی ئەو قوربانییانەی لەم گۆڕستانەدا نێژراون بۆ شەش هەزار و 782 كەس بەرز بووەوە.

كۆمەڵكوژیی سێبرێنیتسا بە گەورەترین تاوانى مرۆیی ئەورووپا لە دوای جەنگی جیهانیی دووەم دادەنرێت كە تێیدا لانی كەم هەشت هەزار و 372 هاووڵای بۆسنی لەسەر دەستی هێزەكانی سڕبیا بە سەرۆكایەتی ڕاتكۆ میلادیچ كۆمەڵكوژ كران. 

لە ڕێوڕەسمەكەدا بەرپرسانی باڵای بۆسنە بەشدارییان كرد. 

مێژووی ئەم تاوانە دەگەڕێتەوە بۆ 11ی تەمموزی 1995، كاتێك هێزەكانی سڕب دەستیان بەسەر شارەكەدا گرت و هێزە هۆڵەندییەكانی سەر بە نەتەوە یەكگرتووەكان نەیانتوانی پارێزگاری لە مەدەنییەكان بكەن و ڕادەستی سڕبەكانیان كردن. 

ساڵانەیش لەم یادەدا بە ناسینەوەی ڕوفاتی نوێ، قوربانییەكان لە تەنیشت هاوڕێ و خزمەكانیان بە خاك دەسپێردرێنەوە.