ئێران چەند بنکەیەکی سەربازیی ئەمریکایان لە بەحرێن، ئوردن و کوێت کردە ئامانج

سوپای ئێران و پاسداران چەند بنکەیەکی سەربازیی ئەمریکایان لە بەحرێن، ئوردن و کوێت کردە ئامانج، هاوکات عەممان ڕایگەیاند کە هەشت مووشەکی ئێرانیی بەسەر خاکی وڵاتەکەیدا خستووەتە خوارەوە.
سوپای ئێران ڕایگەیاند کە ئامێر و دامەزراوەکانی سوپای ئەمریکای لە بنکەی ئاسمانیی "شێخ عیسا" لە بەحرێن کردووەتە ئامانج و جەختی کردەوە کە هەڕەشە و هێرشەکانی لایەنی بەرامبەر، تەنیا ئیرادە و توانای بەرگریی هێزەکانیان بۆ ڕووبەڕووبوونەوە بەهێزتر دەکات. هاوکات، سوپای پاسدارانی ئێران ڕایگەیاند کە بە مووشەک و فڕۆکەی بێفڕۆکەوان بنکەی ئاسمانیی "عەلی ئەلسالم"یان لە کوێت پێکاوە، وەک وەڵامێک بۆ هێرشەکانی شەوی ڕابردووی ئەمریکا بۆ سەر بەشێک لە کەناراوەکانی باشووری ئێران.
لە لایەکی دیکەوە، سوپای ئێران ئاشکرای کرد کە بە فڕۆکەی بێفڕۆکەوان هێرشی کردووەتە سەر تجهیزاتی هێزەکانی ئەمریکا لە بنکەی "ئەزرەق" لە ئوردن. بەگوێرەی ڕاگەیەندراوی سوپا، ئەم هێرشە لە تۆڵەی بۆردومانکردنی سەربازگەیەکی شاری "بەمپۆر"دا بووە کە بووە هۆی کوژرانی حەوت سەربازی ئێرانی.
لە بەرامبەردا، هێزە چەکدارەکانی ئوردن ڕایانگەیاند کە لەلایەن سیستەمی بەرگریی ئاسمانیی وڵاتەکەیانەوە، هەشت مووشەکی ئێرانی کە ئاڕاستەی خاکی شانشینی ئوردن کرابوون، لە ئاسماندا ڕووبەڕوویان بوونەتەوە و خراونەتە خوارەوە.