ئێران زنجیرەیەك هێرشى بۆ سەر بنكە ئەمریكییەكان لە ناوچەكە ئەنجامدایەوە

پەیام

لە بەرانبەردا سوپای پاسداران زنجیرەیەك هێرشی موشەكیی بۆ سەر بنكە ئەمریكییەكان و چەند وڵاتێكی ناوچەكە ئەنجام دایەوە.

سوپای پاسدارانی ئێران ڕایگەیاند، لە وەڵامی "تاوانە جەنگییەكانی ئەمریكا"، زنجیرەیەك هێرشیان كردووەتە سەر سیستمی ڕاداری لە عومان، بنكەیەكی سەربازی لە كوەیت و ناوەندی ئۆپەراسیۆنەكانی تەنەف لە سوریا و بنكە و كەرەستەكانی ئەمریكا لە بەحرەین. 

سوپای پاسداران جەخت دەكاتەوە كە گەرووی هورمز لەژێر كۆنترۆڵیاندا دەمێنێتەوە و تا هێرشەكانی ئەمریكا بەردەوام بن، ڕێگە بە هەناردەكردنی "تەنیا یەك دڵۆپ" نەوت و غازی ناوچەكە نادەن، ئەمەش بووەتە هۆی پەككەوتنی تەواوی هەناردەی وزە.

لەلایەكی دیكەوە، سوپای ئوردن ڕایگەیاند كە سێ موشەكی ئێرانییان لە ئاسمانی وڵاتەكەیان تێكشكاندووە بێ ئەوەی زیانی گیانی و ماددی لێبكەوێتەوە. هاوكات، وەزارەتی بەرگری قەتەر ئاشكرای كرد كە هێزەكانیان بەرپەرچی چەند هێرشێكی ئاسمانییان داوەتەوە. وەزارەتی ناوخۆی قەتەریش برینداربوونی منداڵێكی بەهۆی كەوتنەخوارەوەی پاشماوەی موشەكە تێكشكێنراوەكان پشتڕاست كردەوە.

سوپای پاسداران دەڵێت ئەمریكا بەهۆی بێهیوایی لە ڕووبەڕووبوونەوەی سەربازی، پەنای بۆ لێدانی ناوچە مەدەنییەكان بردووە و لە كاتی دانوستانەكاندا ئاگری شەڕی خۆش كردووە، بۆیە پرۆسەی وەڵامدانەوەیان بە توندی بەردەوام دەبێت.