پێش 3 هەفتە
208 جار خوێنراوەتەوە
ئەمریكا دەیان ئامانجی سەربازی و پردی ستراتیژی لە ئێران بۆردومان کردەوە
پەیام
سوپای ئەمریكا بۆ شەشەم شەوی لەسەریەك دەیان ئامانجی سەربازی و ژێرخانی ستراتیژی لە ناوخۆی ئێران پێكایەوە.
فەرماندەیی ناوەندیی ئەمریكا (سێنتكۆم) ڕایگەیاند، بە فەرمانی دۆناڵد ترەمپ و لە ڕێگەی فڕۆكەی جەنگی، درۆن و كەشتییەوە، دەیان ئامانجی سەربازییان لە ئێران پێكاوە، كە پێكهاتوون لە بنكەكانی بەرگری كەناراوەكان، ڕادار و ژێرخانی لۆجستی.
میدیاكانی ئێرانیش بڵاویان كردەوە كە تەقینەوەی بەهێز شاری چابەهاری هەژاندووە و بورجی چاودێری دەریایی بۆ سێیەمجار لە هەفتەیەكدا كراوەتە ئامانج.
لە پارێزگای هورمزگان، هێرشە ئاسمانییەكان پێنج پردی ستراتیژییان گرتووەتەوە، لە شاری "بەندەر خەمیر" بەهۆی ڕووخانی پردەكانەوە حەوت كەس كوژراون و نۆ كەسی دیكە بریندار بوون.
وەزارەتى تەندروستیی ئێرانیش ڕایگەیاند، بەهۆى هێرشەکانەوە 8 کەس کوژراون و 20ى دیکە برینداربوون.
بەرپرسێكی ئەمریكی بە "وۆڵ ستریت جۆرناڵ"ی ڕاگەیاندووە، ئامانجی تێكدانی ئەو پردانە بڕینی هێڵی گەیاندنی هاوكاری بووە بۆ شاری بەندەر عەباس، كە ئێران بۆ هێرشكردنە سەر كەشتییەكان بەكاری دەهێنێت. هاوكات، وەزارەتی وزەی ئێران پشتڕاستی كردەوە كە هێرشەكان زیانیان بە هێڵەكانی گواستنەوەی وزە گەیاندووە و بووەتە هۆی پچڕانی كارەبا لە چەندین ناوچەی باشووری وڵاتەكە.
لە تۆڕە کۆمەڵایەتیەکان شەیری بکە