فانس: ئیسرائیل ڕێگریی لە ڕێككەوتنی دیپلۆماسی لە نێوان ئەمریکا و ئێران دەکات

پەیام
 
جەی دی فانس، جێگری سەرۆكی ئەمریكا، لایەنە حكومییەكانی ئیسرائیلی تۆمەتبار كرد بە شێواندنی سیاسەتی واشنتۆن بەرامبەر تاران و ڕێگریكردن لە ڕێككەوتنی دیپلۆماسی، ئەوەش بە ئامانجی ڕاكێشانی ئەمریكا بۆ ناو جەنگێكی بەردەوام لەگەڵ ئێران لە جیاتی دۆزینەوەی چارەسەری سیاسی.

لە چاوپێكەوتنێكی سێ كاتژمێریدا لە پۆدكاستی "جۆو ڕۆگن ئێكسپیریانس"، فانس ئاماژەی بە ڕاپۆرتێكی گۆڤاری "تایم" كرد كە كەمپەینێكی كاریگەریی نهێنی و پارەداركراوی لەلایەن لایەنە ئیسرائیلییەكانەوە ئاشكرا كردووە.

ئەم كەمپەینە تێیدا پارەی داوە بە كەسێكی پێشوو لە تیمی هەڵمەتی دوناڵد ترەمپ بۆ ئەوەی بڕە پارە بەسەر كەسانی كاریگەری ئەمریكی دابەش بكات، بە ئامانجی هێرشكردنە سەر ڕێككەوتنی ئێران و ئەمریكا.

جێگری سەرۆكی ئەمریكا دوپاتی كردەوە كە "بەبێ هیچ گومانێك" دەزانێت كەسایەتییەكانی ناو حكومەتی ئیسرائیل هەوڵی دەستكاریكردنی ڕای گشتی و كاریگەری دروستكردن لەسەر بڕیارەكانی ناو واشنتۆنیان داوە؛ ئەمەش بۆ پەكخستنی دانوستانەكان و پاڵنانی ئەمریكا بەرەو درێژكردنەوەی ڕووبەڕووبوونەوە سەربازییەكان.

هاوكات جەی دی فانس لەم دیدارەدا چەند پرسێكی تری وروژاند، لەوانە بڕیاری جەنگ دژی ئێران و گومانەكانی پەیوەندی بازرگانی "جێفری ئێپستاین" بە دەزگای هەواڵگری ئیسرائیلەوە، بەبێ ئەوەی بەڵگەی ئاشكرا بۆ پشتڕاستكردنەوەی ئەو گومانانە بخاتە ڕوو.